有公民黨「周迅」之稱嘅陳淑莊Tanya，舊年區選喺山頂撼低自由黨，噚日位於上環嘅議員辦事處正式開幕，身為師傅嘅公民黨黨魁余若薇，同各黨派都有人畀面出席，自由黨陳特楚都有到，佢見新丁Tanya獲花舖免費送花籃祝賀，大讚靚女果然有着數。
所謂英雄難過美人關，噚日呢位美人身旁，有一位只顧耷低頭捧食物，或者只係揸相機而唔願上鏡嘅男士低調護花，公民黨高層透露，呢位人稱「英雄」嘅男士，原來係Tanya甚少曝光嘅男友。
八方同呢位英雄傾過偈，但佢同好多傳統英雄一樣，都係沉默寡言，一味講：「我想保持低調。」唔通Tanya從政後要玩地下情？有公民黨人靜靜雞話畀八方知，呢位「英雄」係一間中式餐館大廚，亦有人話佢係老闆級人馬，八方噚日食過佢整嘅餃子，味道果然好得，有個烹飪高手男友，難得Tanya仍然咁苗條。
Tanya開辦事處為公民黨做地區工作，該黨立法會議員湯家驊Ronny則喺大埔開新辦事處備戰選舉，請咗商務及經濟發展局局長馬時亨到場，肥馬交足功課，表演咗場棟篤笑娛人娛己。