姚明左腳踝骨壓力性骨折，今季不能再出場比賽，是否能及時康復，趕在八月北京奧運出場，甚有疑問。姚明話絕不放棄，一定要出席奧運，當然係佢主觀願望，正如碧咸在二○○二年世界盃之前受傷，仍然趕及出場，但佢在場上踢成點，大家都知道不如理想啦。姚明嘅隊醫話姚明需要四個月左右先至可以康復，到時已經係七月，八月就復出打波，有冇狀態呀？
姚明之傷，據上任休斯頓火箭教練雲根廸所講，係打波太多，長期疲勞所致。身高七呎六，經常在籃底下搶籃板球與跳射，姚明隻腳長期受身體重量壓迫，受傷並不奇怪。做NBA正選球員好辛苦嘅，一季打八十二場，全美國飛來飛去，季後又要返中國代表國家隊東征西討，鐵人都會受傷啦。雲根廸叫姚明以後要學懂對上司說不，乃美國佬之言。高比拜恩、奧尼爾等以前就不時回美國說不，唔肯代表美國隊出戰，利物浦嘅加力查與曼聯史高斯向英格蘭說不、退出國家隊。但姚明係中國人喎，點敢向中國籃總說不呀，有王治郅前車可鑑，姚明唔肯代表中國隊，一定成為中國球迷眼中之漢奸。
姚明長期如此征戰，令人擔心佢會成為籃球世界嘅雲巴士頓，在黃金時期被傷患困擾而提早退休。中國隊需要姚明爭錦標，NBA需要姚明打開中國市場，唔可以唔繼續打籃球㗎。你睇吓，今年美國超級碗創下電視收視紀錄，觀眾估計有九千八百萬人，但休斯頓對密爾沃基一場普通到極嘅常規賽，因有姚明大戰易建聯之號召，中國竟然有二億電視觀眾，令到NBA歡喜若狂。易建聯唔爭氣，最近已淪為後備，姚明就表現極好，每場平均得分與籃板球都係雙位數字，係NBA最好嘅中鋒，偏偏呢個時候受傷唔打得，豈止中國籃總大驚，NBA亦覺沮喪。姚明已經不屬於自己，不屬於姚家，而係屬於中國與NBA球迷嘅，正是人在江湖，身不由己，一位超級籃球明星受到十幾億人嘅壓力，只係腳傷，已係幸運。