萬人引頸以待的滙控（005）業績今日出台，究竟次按影響「大笨象」純利及業務前景有幾深遠，散戶睇完份「成績表」就清楚。
3月期指大低水過百點，有散戶睇完嚇到面都青埋，其實有乜好驚，低水只是反映滙控及恒生（011）除息因素，加上多隻藍籌股亦陸續在月內派成績表，所以期指大低水作不得準。
目標價64元
跌得好殘的航運股近日走勢見改善，其中星俠看好成交漸增而股價落後的東方海外（316），上周五收46.70元，跌1.2%。該股07年上半年純利173億元，同比上升達6.9倍，每股盈利27.60元，其中有155億元係出售美國貨櫃碼頭的特殊盈利。集團近年增購船隊，藉此汰舊換新，出售舊船可帶來特殊盈利之餘，亦令集團船隊整體平均船齡下降。
摩通發表報告，認為東方海外股價太殘，將評級調升至「增持」，但目標價只得56元。不過，星俠認為該股業務前景唔差，目標價又點止56元，可看高些睇64元，短炒以40元止蝕。