【溫哥華直擊】上周四於溫哥華舉行肥姐沈殿霞葬禮，今日則在香港紅館舉行追思會，而溫哥華影視人協會亦於昨日率先舉行肥姐悼念活動，加拿大總理代表、溫哥華市長及龍劍笙均有出席。其間張翼談到肥姐上月跟他約定在溫哥華見面時更幾度泣不成聲，他說：「我都諗唔到喺咁嘅情況下見面。」
「永遠的懷念肥姐沈殿霞」悼念活動於昨日凌晨4時（溫哥華時間29日中午12時）在溫哥華中僑互助會舉行，出席者逾百人，除岳華、龍劍笙（阿刨）和張翼等外，還有加拿大總理哈珀（StephenHarper）代表DeborahMeredith及溫哥華市長蘇利文（SamSullivan）。阿刨抵達會場後，與岳華和張翼問候一番，繼而再向肥姐遺照鞠躬致敬。
「好唔捨得你」
活動上，播放了肥姐生前片段，及肥姐與欣宜及前夫鄭少秋的合照，而加拿大總理代表、蘇利文、岳華和張翼先後上台致悼詞，張翼談及肥姐生前點滴時表現最為激動，幾度傷心痛哭，他說：「我同肥姐相識超過40年，佢每次返嚟都會帶好多好嘢同朋友分享，但佢對自己健康係好疏忽嘅人，佢冇每年定時做身體檢查，四個月前我同太太去咗香港都有探佢，但每次探佢都見佢一日比一日消瘦，真係好心痛。但我哋幫唔到佢啲乜嘢，我記得2月1號我太太打電話畀佢，諗住去探佢，順便叫佢2月4號返溫哥華過年，佢話：『我喺街買嘢，你哋唔使過嚟啦，我哋喺溫哥華見啦。』我都諗唔到喺咁嘅情況下見面，阿肥我真係好唔捨得你。」張翼說話至此已泣不成聲。
精神不屈不撓
岳華在台上說：「兩年前睇到《友緣相聚》，長途跋涉拍節目，都算係佢一生中最大型節目，希望大家珍惜親人朋友，任何一個萍水相逢嘅人都有友緣相聚時刻。」
加拿大總理代表和蘇利文均有表揚肥姐在當地華人社會之貢獻，蘇利文以流利廣東話說：「肥姐開心果，10幾年前我開始講廣東話，我睇過一個節目叫《歡樂今宵》，我好鍾意佢，我見過佢幾次，佢係一個好好嘅藝術家，佢代表香港不屈不撓嘅精神，我話佢亦代表溫哥華不屈不撓嘅精神。」悼念活動約一小時，臨結束時，場內賓客起立鞠躬，默哀一分鐘，向開心果作最後致敬，繼而現場播出欣宜與劉家昌合唱的《連心》，場面相當感人。
採訪、攝影：李志明、黃曉程