上周五開始公開招股的中國鐵建（1186），首日孖展認購反應熱爆，8家證券行共錄得約718億元孖展認購額，創近年新股首日認購紀錄。近期銀行水浸，亦加入新股孖展借貸搶生意，孖展息更較證券行為低，故此中鐵建今次招股，超額倍數好大機會勁過中鐵（390）的200倍。
中籤率或低得出奇
不過借大額孖展抽中鐵建，係咪真係咁好賺？以中鐵建招股價上限10.70元計，其08年預測PE約29倍，較中鐵約40倍PE為低。若中鐵建上市後，股價升至與中鐵相若的PE，即每股約14.80元，較上限定價仍有38%上升空間。理論價是如此計算，惟中鐵及中鐵建兩間公司的毛利及純利率有所不同，難以直接比較。
參考中鐵招股，B組大額申購的中籤率約0.79%，認100萬股基本可配7000股，另2959份申請中，2518份可額外配多1000股，當抽中8000股計，中鐵首日升27%，唔計手續費賬面賺12640元，但係孖展息，以5厘計成本要7000幾銀，喺大弱市炒股機會成本唔高情況下，回報尚可接受。
中鐵建抽股回報，最大變數係中鐵招股時受銀行收緊對證券行信貸影響，故超額200倍實屬偏低，但中鐵建卻遇上銀行放水，孖展額大增，其大飛中籤率，計及回撥機制分分鐘低得出奇。當然美股忽然暴跌，若中鐵建掛牌時氣氛不濟，其首日表現可能唔夠理想。大飛抽中鐵建應該唔使點蝕，但回報未必如想像咁好。
天大無成交難炒起
剛於去年底由創業板轉主板掛牌嘅天大石油管材（839），將申請發行1.35億股A股，集資約5億元，公司又公佈去年業績，及10股送5股紅股。送紅股基本上等於拆細股份及增流通量，惟公司同時建議兩股合併一股，唔知想點。事實上天大轉主板後成交依然疏落，多過一球成交嘅日子唔多過兩日，上周五僅22萬股易手，回歸A股又如何？無成交想炒起都難，唔增加流通量幾好消息都無用。