升咗幾日，花旗股市有啲攰，前晚伯南克喺國會講嘢，都幾悲觀，嚇到股民爭相走貨，金融股係咁畀人質，梗係啦，老伯話會有細銀行執笠喎。
唔好以為老伯危言聳聽，佢喺國會講咁多次嘢，有邊次唔係老老實實㗎，前晚銀行委員會主席仲喺聽證會上讚佢答問題夠直接，冇轉彎抹角。
花旗股市插番轉頭，港股梗係冇運行，最多跌過500幾，不過晏晝追番唔少，最後跌260點，24000關嘅支持力好強，下禮拜會點，就要睇吓花旗股市嘅表現嘞，不過，大家要留意多樣嘢，就係㗎仔股市嘅技術走勢轉壞咗，如果下禮拜顯著滑落，對港股都會有影響。
唔少得要提嘅梗係滙控（005）下禮拜一公佈業績，業務應該係賺錢嘅，賺幾多就要睇撥備同撇賬數字，金管局任總早前公開呼籲銀行要撥備充足，東亞（023）已按指示辦事，滙控會點，好快就知，不過滙控嘅業績必定會影響股價同大市嘅表現，大家呢兩日應該諗定兩手準備。
破位可見6.2元
工行C輪7722：工行（1398）昨收5.54元，逆市升2巴仙，算係好強嘅股份，睇呢幾日成交同盤路應該仲會掃上去，先睇5.80元，破位睇6.20元，可以諗吓隻C輪7722。隻輪昨收80仙，槓桿率6.9倍（有效4.4倍），正股升上6.20元，7722應該喺1.26元樓上，正股跌穿5.28元止蝕。