最近利物浦似有回勇迹象，所以今集〈拉闊足球場〉就讓讀者討論，紅軍可唔可以做「4哥」。大部份讀者都支持經驗及實力俱佔優的利物浦，可以力壓主要對手如愛華頓、阿士東維拉和曼城；不過參加〈讀者激鬥〉的阿樂就狂踩利記。點解？因為佢支持曼聯囉！
戰鬥員A心水推介
星期六45曼城勝韋根2:0（7倍）
星期日7保頓負利物浦0:1（5.2倍）
星期日19愛華頓和樸茨茅夫2:2（15倍）
戰：戰鬥員A M：Mike A：Andy 樂：阿樂
M：大家都知歐聯等於金礦，所以英超球隊爭崩頭，都係為咗打入前4，以獲得歐聯資格。
戰：係呀，由於阿仙奴、曼聯同車仔已經帶咗出嚟，所以其他球隊只有第4名可爭。
M：我哋今日就搵咗Andy同埋阿樂，睇下佢哋認為邊隊可以做「4哥」。
A：近呢幾季利物浦市都有球隊打入前4名，由03年開始，利記佔咗3次，至於愛華頓就得1次，反映有賓尼廸斯帶住嘅利記始終好啲。
樂：我鍾意得曼聯，就連帶捧埋曼城。唔好話我盲目，事關以曼聯個勢咁勁，數勻英超就只有曼城可以一季贏佢兩次，可見呢支曼市球隊唔可以睇小。
M：不過戰鬥員A啱啱提過，曼城近3場輸兩場，驚唔驚佢哋跌watt？
曼城平庸 愛華頓未夠班
A：我唔止覺得曼城狀態下滑，而且質素都唔係想像中咁高；至於愛華頓之前試過攞第4後出事，今屆應該唔會咁冒進。
樂：我唔撐利記，係因為之前佢哋竟然會輸畀韋斯咸同班士利，有冇搞錯！我覺得凡親睇好利記，肯定開下盤波，反而之前衰衰咁對國米，又畀佢哋贏2:0，太飄忽喇！紅軍喺歐聯又係咁晉級，好難兼顧聯賽。
M：咦，講中紅軍死穴噃，Andy有咩回應？
A：呢幾年賓尼廸斯帶隊，利物浦都兼顧到；上屆打入歐聯決賽，最後喺聯賽咪又係攞前4名。輸畀班士利嗰次，都係因為留力打英超同歐聯啫。唔好唔記得紅軍有財政壓力，幾大都要爭第4。
「最好利記衰到貼地」
樂：紅軍真係太飄忽喇，成日都累到我輸錢，我真係好鬼憎呢隊波，由細憎到大，最好佢衰到貼地（開始失控），今季乜都冇。
M：冷靜啲，你呢啲都唔係理由，叫人點信你先！
A：而且曼城班主他信返咗泰國，都仲要睇佢班唔班到水，假如他信俾人拉咗，曼城肯定士氣受挫。
樂：我唔理邊隊前4，總之一定冇利記份。
戰：我總結下啦，曼城係有質素，不過比起紅軍仲有距離。
M：至於愛華頓，前車可鑑下，相信莫耶斯會醒目。
戰：既然大家都覺得Andy理據較充份，就一於撐利物浦做「4哥」喇！
「紅軍粉絲」：我哋坐四望三
身為利物浦fans，Ringo當然撐愛隊可以打入前4，佢更加話車仔家陣內亂，又傳出將帥不和，分分鐘俾利記趕過，所以利物浦可說是坐4望3。
Mike就提醒Ringo，對利記來講，最重要的日子應該係3月尾，因為利記會先在23日對曼聯，再於30日對愛華頓，後面個場更加是「6分波」，可以話係「4哥之爭」的關鍵戰。
提到愛華頓，Ringo就提番讀者，前季拖肥糖試過以第4名身份，成功殺入歐聯外圍賽，最終不敵維拉利爾出局；這項「佳績」打亂球隊部署，更一度要護級，最後僅以第10名過終點；相信莫耶斯衡量過己隊實力後，都會腳踏實地，以足協盃為首要目標。
Ringo貼士
星期六45曼城勝韋根2:1（7.5倍）
星期日7保頓負利物浦1:3（14倍）
星期日19愛華頓和樸茨茅夫1:1（6.5倍）
送你英軍斜揹袋
今集以webcam打入嘅讀者，除咗會由我哋幫你買3串7波膽，講得最好嘅讀者，更加會得到英軍斜揹袋；獎品咁豐富，仲唔即刻上網登記？
〈拉闊足球場〉下次舉行日期：06/03
想參加？即上
http://soccer.atnextcom/jp/soccer
節目重溫：
http://sport.appledaily.com
