超級星期天點可以冇我求驗客？同平時唔同，逢禮拜日我會少啲批判，同大家分享多啲得意新聞，等大家睇得過癮。
足球員踢到血脈沸騰，面對球證吹罰，偶爾會「獸性大發」。假如前面係一名曲線撩人嘅女球證又會點呢？早前為成人雜誌《花花公子》拍裸照而被罰停賽嘅巴西女球證安娜終復出吹雞，但佢若果聽聞意大利出現同行被「胸襲」事件後，佢仲敢唔敢踏入綠茵場呢？
森巴女郎身形火辣辣，女球證安娜亦當仁不讓，因其身形同樣貌令異性動物充滿無限暇想，而獲成人雜誌《花花公子》垂青，喺舊年7月拍攝一輯酬金價值23萬美金（約180萬港元）嘅裸照；然而，該輯照片同時招來國內腥風血雨嘅狠批，加上剛巧比賽誤判俾人捉到，令巴西足總有藉口罰佢停賽245日，免得球員睇完「肉照」落場會眼火爆。
17歲小子施祿山之爪
儘管安娜已於2月復出吹雞，但未知佢聽到喺意大利球壇嘅「胸襲奇案」後，會否驚怕而改變初衷？話說一名血氣方剛嘅意國17歲小子，喺青年級比賽上被罰紅牌後，遂趨前向女球證施以「祿山之爪」，及後被罰停賽6個月兼遭球會棄用，而足總懲罰嘅原因為「將手放喺女性隱私部位。」
效力米蘭市一青少年球會嘅當事人MC為事件解釋道：「我的確碰到了其胸部，但我係要想佢睇吓我球衣嘅波印，證明我冇手球，只係心口控球。」當地報紙為保護該初生之犢以MC匿名，「出示紅牌時，我有觸碰佢，但隊友可以證明我乜都冇做過。」呢名𡃁仔肯定冇諗過男球證唔掂得，女球證就更加唔掂得！
意人怪癖搔下體「辟邪」
慘情係連球會都唔幫佢，球會發言人表示：「希望球員能從此獲得教訓，MC並非壞孩子，可惜我當時唔在場。」
講開又講，𠵱家女性判官增加，但意大利人有種怪癖，就係會當眾搔下體「辟邪」，眼利觀眾可能留意到部份球員甚好「此道」；試想，若然日後有女球證對此睇唔過眼而投訴性騷擾，會唔會掀起新一輪法律訴訟潮呢？
話你知：桌球女裁判低胸裝執法
其實家吓全球都講緊男女平等，所以喺講求公平競技精神嘅體壇又點會唔支持先？好似NBA籃壇同埋桌球壇，偶然間都會見到女裁判執法，尤其是後者，唔知點解啲女裁判係都要着住件低胸內膽加件西裝外套執法，咁搞法，觀眾視線都唔知應該放喺張波檯度定還是……
近幾年不時見到女球證喺NBA賽事中吹哨，最出名嘅當然係第1位喺季後賽執法、叫龐瑪嘅女球證啦！唔知係咪女性角度睇籃球賽埋身動作覺得特別粗野，所以哨聲四起，令到唔少球員好快就個犯纏身，搞到動彈不得。
其實咁樣都幾好，成班大男人喺場上硬碰硬火爆場面唔少得，所以如果有個女球證，或者可以令到躁躁地嘅球員我見猶憐，即時收火都唔定呢！
不過，要數最令人留有深刻印象嘅女裁判，一定要係「桌球女執法官」嘞！外套裏面襯件低胸衫，烏低身執波或者擺波時，幾咁風光明媚先得㗎，而且唔少都仲要係幾省鏡嘅㖭！咁嘅情況，叫班球迷點可能唔幫球手打氣呢，點解？個波唔打入袋，邊有波執呀！