港珠澳大橋項目有望短期上馬，西環David認為對合和實業（054）有冲喜作用，所以噚日打嚟推介。
碩：黃敏碩 欣：李靄欣 玲：楊慧玲
David：如果港珠澳大橋上馬，揸住七成合和公路（737）嘅合和實業短炒得過，36蚊入貨，博佢半年上到40蚊。
碩：你覺得港珠澳大橋因素，對佢有乜推動作用？
David：條橋嘅經營模式話好似大欖隧道同西隧咁，如果合和攞到經營權，對佢好有利。
欣：𠵱家一來未知合和會唔會攞到份合約，二來經營模式仲未落實，政府政策可能有變，都係不明朗嘅因素。
碩：如果真係炒消息，半年未必去到40蚊，不如先睇38蚊。
--西環David建議--
建議買入價：36元 目標價：40元
止蝕價：32元 時期：半年
低撈國泰博反彈
張先生：國泰航空（293）由高位跌咗好多，呢隻股有佢本身價值，我想15蚊買，到17.5蚊就走，喺業績前短炒。
玲：明顯油價太高，對佢好不利。
碩：雖然油價高，但近期巿況好番啲，佢應該可以守住16蚊，可以等低啲入貨博反彈，但係環球經濟唔明朗，所以唔係中線首選。
欣：除咗正股，張先生可以留意吓啲街貨少、行使價大約18至21蚊嘅call輪。
--觀塘張先生建議--
建議買入價：15元 目標價：17.5元
止蝕價：14元 時期：短炒
睇哈動上20蚊
李小姐：哈爾濱動力（1133）股東啱啱配股，家陣股價喺低位，加埋雪災重建概念，一個月上唔上到20蚊？
碩：哈動業務多元化，又配合政府環保方向，中線可以睇高一線。不過兩會之後中資股仲有機會尋底，所以唔建議高追，可以博見20蚊。
欣：佢呢兩個月都落過17蚊，所以可等17蚊入貨。
玲：今個月基金都減持呢隻股，加埋配股消息，短線睇淡。
--屯門李小姐建議--
建議買入價：17.74元 目標價：20元
止蝕價：17元 時期：一個月
炒三林要識落車
Joe：今日入咗三林環球（3938），佢最近收購咗木地板生產商，對佢生意有幫助，想短炒。
碩：有水位就要落車，今日股價大上大落，可能已經反映咗收購因素。木業唔同礦業，商品價格同佢股價冇太大關係，短炒賺10%至15%可以止賺。
欣：月中創過新高，可以等破位先追。
玲：呢隻股炒味太濃，升一兩日就會跌。
--荃灣Joe個案--
買入價：1.2元 目標價：1.6元
止蝕價：1元 時期：一個月