被陳冠希淫照事件牽連的受害者眾，但因事件而得益者，至少有麥浚龍（Juno）一個。傳鍾欣桐（阿嬌）在這段黑暗日子中多得Juno不離不棄，二人感情一日千里，甚至談及婚嫁，Juno贏得美人歸又成為城中焦點，人氣與知名度急升。昨日他戴着與阿嬌的疑似定情戒否認蜜運，但卻以6個好字來形容與阿嬌的深厚情誼，被問到會否介意阿嬌的過去時，他表示絕不介意，更謂拍拖就會全程照顧她。
年僅23歲的麥浚龍與27歲鍾欣桐的姊弟戀傳得鬧哄哄，有傳阿嬌在農曆新年期間一直借住Juno家，二人感情進展迅速，雙雙戴上定情戒指，還到達談婚論嫁地步，Juno最近還不時將「朋友」送的銀包及打火機等禮物照片貼上網誌，被指是女友阿嬌送的定情物。
自稱年輕未諗結婚
昨日Juno戴着疑似定情戒現身旺角朗豪坊舉行簽名會，首次回應戀情，雖然他對戀情全盤否認，但每當提起阿嬌時，一向愛裝酷不苟言笑的他難掩喜悅之情，嘴角泛起絲絲甜笑。Juno起初以4個好字形容與阿嬌的好朋友關係，後來加碼以6個好字來形容，可見二人「友好」程度絕對深厚。以下為Juno的訪問內容。
麥：麥浚龍 記：記者
記：你有冇同阿嬌拍拖？
麥：我哋係好好好好朋友。
記：乜嘢朋友？拖手嗰隻？
麥：冇拖手。
記：阿嬌有冇去你屋企住過？
麥：我諗就冇啦，我屋企出面有好多狗仔隊，有乜嘢人出入過佢哋比我更清楚。
記：3,000幾蚊個銀包同埋打火機係咪阿嬌送？
麥：唔係，係另一個朋友送。
記：你哋感情係咪邁進一大步？
麥：我哋會通電話，佢身邊朋友同我都好關心佢，睇報紙見佢已經投入工作。
記：聽講阿嬌年尾嫁畀你喎？
麥：我冇諗過結婚，聽到一頭霧水，呢個年紀未去到亦都冇諗過結婚。
「結婚同愛情睇緣份」
記：阿嬌有冇見過你父母？聽講你阿爸唔鍾意佢，阿媽又唔畀佢入門？
麥：冇見過，我拍戲做嘢成日飛去第二度，好少帶朋友返屋企，家人同朋友係分開嘅，佢冇去過我屋企，冇諗過結婚，冇諗過入門，我好少介紹朋友畀屋企人識。
記：情人節同新年點過，開唔開心？
麥：開心，同狗仔隊過。
記：屋企人有冇問過你最近啲新聞？
麥：冇，屋企人好少睇報紙，只係同我講屋企有好多狗仔隊。
記：阿嬌係咪你結婚對象？
麥：結婚同愛情要睇緣份，冇得Push。
記：會唔會介意阿嬌嘅過去？
麥：每個人都有經歷同過去，少啲講就會完結，每個人都有經歷，同一個人拍拖要全程照顧佢，唔好理同介意佢嘅過去。
記：阿嬌咪好幸福？你好偉大。
麥：呢個係我自己嘅睇法。
記：你已經遇到結婚對象啦？
麥：傳媒以為係，每日報紙都有新諗法，你哋仲清楚過我，暫時以工作為先。
「好好好好好好朋友」
記：有冇因為呢件事同阿嬌再friend啲？
麥：大家一向都係friend，唔會因為呢件事影響關係，我哋係好好好好好好朋友。
記：你哋互相送咁多名貴禮物，梗係好朋友啦。
麥：做朋友唔係講錢，拍拖都唔係以錢去衡量。
記：你手上嘅戒指係咪日日都戴住？有冇特別意義？有冇刻名呀？
麥：冇特別意義，都冇刻名，如果有意義嘅飾物就唔會除，但呢個係我新飾物，所以咪成日戴住。
記：知唔知最近有反嬌大行動。
麥：冇睇過，每個人都有鍾意同唔鍾意，唔好介懷，做好自己本份。
記：你首新歌《吃鯨魚的人》係咪送畀阿嬌？
麥：唔係，係Wyman（黃偉文）送畀我。
此外，昨日Juno在薛凱琪曾被扑頭的朗豪坊舉行簽名會，問到他會否怕被襲擊，他說：「唔驚，嚟得簽名都係支持我，啲人會自律。」現場約有近百名歌迷等候簽名，並有三名保安維持秩序。
採訪：胡比 攝影：陳偉權
話你知：熱煲《真的戀錯了?!》
近日經常與阿嬌在家恩愛煲碟過日辰的Juno，昨日繼續在blog內貼出數張DVD的相片（圖一），不過向來愛看動作片的他，未知是否因有愛情滋潤而變得浪漫感性，其中一隻DVD為即將於3月13日在港上映、由史提夫卡爾（SteveCarell）及茱麗葉庇洛仙（JulietteBinoche）主演的愛情喜劇《DaninRealLife》，港譯很「撞鬼」地竟是《真的戀錯了?!》（圖二）。
《真》片劇情講述喪妻住家男Dan在書店邂逅女主角Marie，一見傾心，其後卻發現心上人是弟弟Mitch的新女友。後來二人擁吻時被家人撞破，兄弟決裂，大感為難的Marie決定離開，最後Dan在三名女兒鼓勵下把愛人追回，大團圓結局。
http://www.think-silly.com/juno/
