2008TiidaSporthatch　慳住去盡情掃

好多1.5公升揭背車都予人車仔感覺，第一眼見TiidaSporthatch亦然，但行近啲睇清楚，再坐埋入去，觀感完全唔同晒！日產Tiida車系旗下嘅四門房車同五門揭背車，兩款車都喺08年推出全新版本，個人較偏愛揭背系列，事關車身輕巧，儲物空間又夠靈活，加上車廠更以慳油為設計大前提，慳埋慳埋，夠彈藥開住Tiida去掃貨啦！

記者：梁美甜
攝影：譚盈傑
模特兒：Ruby

外觀更具活力

全新2008日產TiidaSporthatch外觀有啲似新款本田Jazz嘅日本版FitRS，同為1.5公升揭背設計，Tiida新車比上一代設計來得更具活力，可能係線條更深刻流暢所致。
新車採用全新嘅鬼面罩同頭泵把，驟眼睇好有房車格，頭燈線條圓潤中帶剛勁，為車頭樣式營造出斯文得嚟又帶活力衝勁嘅感覺。尾燈組合同樣係全新設計，最盞係採用咗3D設計，外露燈泡為整個尾燈製造出更立體嘅感覺。咁搶眼，夜晚遠一遠都望得到啦！

囗全新頭燈設計，線條硬淨，更有氣勢。

囗15吋胎軨，Standard囉！

囗方格形鬼面罩也甚有特色。

內裝討好

內櫳亦較之前款式來得更有活力更舒適，半桶形駕駛座，夠Sporty又夠承托力，可惜唔係電動調校連記憶駕駛座。自己慣性揸車坐得偏高，貪視野更清更廣，若然揸揸吓有咩感覺唔舒服，輕輕鬆鬆就可以調校到心水角度，換咗手推，一來要用力，角度變化幅度又大，調校困難之餘又唔方便，算係一大弱點。
不得不提係全新設計嘅銀白色儀錶板，醒目嘅三圈式儀錶一列排開，又型又搶眼，更勝在夠簡潔。最右邊係新增嘅耗油計，隨時提供耗油指數。一定要留意個瞬間耗油顯示，超過癮，不過就可能要有過目不忘又或者係一心二用嘅本事，先可以掌握得到嘞！

搵最慳油一腳

瞬間耗油顯示可算超搞鬼之作，佢會顯示每次踩油嘅耗油指數，不過睇得慢嘅話都唔知係邊腳，問你服未？不過如果純熟咗，搵出「最慳油一腳」，會唔會幫你慳唔少呢？

■三圓儀錶，加上新銀白底色，型！

■儀錶可見平均耗油同瞬間燃料嘅資料。

慳油環保落工夫

TiidaSporthatch一如廠方設計同標榜般，外形具活力感之餘，五門五座位，載客多兼上落方便，揭背車上落「貨」都話咁易啦！最正嘅係廠方喺設計上亦非常注重環保同喺燃油節省方面落咗唔少工夫，潮流興環保嘛！根據日本官方資料提供，以10‧15模式為19.4公里/公升，燃油效益表現相當唔錯！
日本車仔表現當然比唔上歐洲龐然大物車種，之不過以1.5公升而言，呢部車性能同表現算唔錯！由九龍塘附近直踩入將軍澳，起步有力加速爽快，細車轉彎靈活反應夠，爽！