百麗國際（1880）及美麗寶（1179）日前聯合公佈，百麗提出以每股6元全面收購美麗寶，較美麗寶停牌前收市價5.21元，有溢價15.16%，昨日復牌美麗寶隨即急升12%，收報5.86元，至於百麗復牌亦升逾4%。
假如你是美麗寶股東，揸住呢隻股票可謂驚喜陸續嚟，由於美麗寶一早已持有百麗逾4%股權，百麗自從有風聲謂會來港上市後，美麗寶股價由07年初升足半年，以年初3.80元計，升至百麗上市時的12.60元，回報已經極為可觀，股東肯定有驚喜。事實上，歐陽風當時都計過美麗寶所持百麗相等於公司市值是相當不合理，美麗寶急升是反映其潛在價值。
百麗掛牌後，美麗寶股價亦都見頂回落，跌落最低7.70元，以為好消息炒完的時候，第二個驚喜又嚟過，美麗寶低位橫行約一個月，公司突然宣佈每50股分派71股百麗，以當時手持每手2000股或市值約17800元的美麗寶計，可獲派2840股百麗，又以當日收市價計，市值約24140元，仲多過買入美麗寶所需成本。
宣佈派送後美麗寶當日收報14.06元，但係股價竟然仲未升完，個零月後最高再升至18元，除淨後，至跌返落3元水平橫行。以為派送又除淨再無好消息，又唔係喎，去年9月美麗寶突然連續3日急升，由3.50元升至最高6.05元，而且成交相當大，之後就喺5元水平橫行，到噚日復牌並宣佈全面收購，可以講得上係第3個驚喜。
一萬股一年賺16萬
粗略一計，假如在07年初以3.80元買入1萬股美麗寶持有至今，先是收取14200股百麗，若揸住唔沽，昨日市值約等於13.6萬元，加埋期間兩次收取中期息合共400元（每股0.04元），及以6元接受全面收購，總回報都有近16萬元。仲有無第4次驚喜？夠啦啩！