股仔聞到有鑊氣，香港華人（655）買定等破位。華人近年轉型搞亞太區房地產相關業務，呢轉資產升值潮，食到應一應。單係07年上半年度（6月底止），集團受惠所參與一個以東亞地區為目標嘅物業基金「LippoASMAsiaPropertyLP」，嚟自呢項投資嘅溢利，高達4.9億銀，連帶半年度純利，亦飆升到貼近7億銀，華人已經肥過肥仔水。
又07年下半年，花旗國次按爆大鑊，要連番減息，資金又周圍搵出路，亞洲區房產繼續水漲船高。加埋下半年以嚟，港股交投暢旺，華人另一瓣主打嘅證券業務keep住好景，華人踏入豐收年，07年度預期PE2字頭單位數冇走雞。又呢期股仔有番勢頭，博資金炒落後，華人有得諗。華人對上星期五，又啱啱貼住條下降軌，買定等破位，博上番近半年高位兩蚊，現價（1.48元）潛在升幅35%，預期PE未有耐上到雙位數。
大同可塑性高
大同（544）上星期五成交股數47球，係一個星期內最多成交嘅一日，兼確認上破半年下降軌，要昅昅。
大同最新NAV約莫0.1元，現價（5.3仙）折讓47%，加埋每股淨現金超過3仙，每股淨現金比率超過62%，有折讓兼有淨現金墊底。又大同家陣業務簡單，成間企業總市值兩億銀多少少，可塑性夠高。呢轉短打，博大同上番上年10月密集區6.7仙，潛在升幅26%，大同仲未有耐到NAV水位，但已經有魚有肉。
