當今世上只得兩種人──寫blog的和不寫blog的。而且十分容易識別，飯前拿相機出來碟子上甚麼都影一餐的就是blogger。地球上的一半人口不要對號入座搶着被得罪，人家的日誌其實豐富了我的人生，網上卧虎藏龍，我甚至還有些天天追看的素人blog界偶像呢。我呢，不能寫，因為不喜歡自己太透明，而且像我這樣賣幾個字維生的人，實在不方便無料供稿日日宴客，不是孤寒，只因無貨，生活的精華每星期煲埋煲埋只得兩啖湯，僅夠應付專欄，多都無。
但都有希望自己擁有blog的一剎那，例如今次在西班牙，在「無寄望唔悶」的情況下，忽然湧進很多值得記的畫面和感受，當堂寧願自己有個架步博客親朋，現在只能迫在兩期專欄內貼堂，將五百件傢俬搬入十九格階磚，百集西遊記連續劇，希望順利剪成一支3分鐘的MV。
所以今天相多字少，非常適合愛看blog的你。
糖炒
如果我有blog，不用將1,300格連環圖濃縮成三張相就好啦。
Papabubble其實值得擁有一篇自己的特稿，即場現炒的棒棒糖（唔係堂，唔使尖叫！）在有線《活得很知味》看過，卻不知上鏡的那家紐約店原來是分支，元祖總壇其實在巴塞隆拿，我也是迷路才迷了過去的，幾十種口味的添加劑長備店內，橘子、甘草、可樂、檸檬……排排任揀，按時出爐的大煲糖漿，稠稠的，倒在冰凉的雲石板上「冷炒」，較啱鐘數入門的人可指定怎樣加料，甚麼味道配甚麼顏色，店員就會在你面前以撻拉麵和拉龍鬚糖的手勢，用15分鐘製成你的個人limitededition，一粒粒又得，lollipop又得，甚至屈成戒指倒模成陽具形都得，等你可以得到一種用自己名字命名的獨特口味，回去自奉或送禮，所有人的手信一站式搞掂晒，都咪話唔方便。我專登訂製了一兜Wyman味回來香港派，上述每種款式都訂了一些，除了一個。
我去巴塞隆拿的時候剛巧是農曆年，我在歐洲都要被迫日日追報紙新聞，何況在香港這班朋友──我的potential受禮人，那個形狀的棒棒糖，我諗唔使啦呱！
（回來後X小姐問我那枝糖是不是粉紅色的，大聲呻笨：「吃得到才代表一級靚女呀！」
我話：「呢啲嘢你都好恨嘅！」
才兩個星期，成個潮流都轉咗啦，你以為潮人金句仲係「我好天真我好儍」呀？Out咗啦！呢排最in的7個字是「我會爭氣我會乖」呀！）
Desertedcity
前傳，為甚麼會迷路呢？不論是旅遊書的白紙黑字還是街頭型人的口耳相傳，都指Barcelona最前衞最edgy的店皆分散於OldCity舊城之中，我看圖搵路，卒之來到一幢荒置的巨型佈景，十室十空，像把整個九龍城寨的遺體丟了過來巴塞隆拿的市中心，而且就在遊客人流最盛的Rambla大街尾段，我不下十次跟同行友人說「如果前面行緊埋嚟呢個人有乜異樣，我哋就即刻掉頭跑」，你可以想像日光日白下居然還有這樣人影無隻，有都似來意不善的鬼城嗎？一日這個陰森的舊區不連根鏟起，恕我無法將巴記投為「最佳旅遊城市」。
結果我們還是找到了那些潮店，一間深入蠻荒的叫LaGaucheDivine的，去到才知執咗笠，另一間簡直不毛的叫Doshaburi，有B仔、Wendy&Jim、MarjanPejoski和Bless賣，但由下晝一點等到五點還是掛了個「出去一陣好快返」的牌出來冇開門，隔鄰二手衫店老闆娘說那個牌掛咗喺度兩個月㗎啦。
（你夠膽就去試吓啦DoshaburiCarrerLledo4-6Barcelona）
巴黎世家不在巴黎時
Hifashion有關的店，兩日行得晒有凸，如果不想在OldCity迷城冒險，大概大型百貨店較安全，例如呢間一入去已見大大個Balenciaga專櫃，朋友話「咪開心住，遠睇佢個款似『巴黎世家』多啲喎，唔係Balenciaga喎！」
我唔信邪，係都要走過去，結果有意外收穫㖭，雞乸咁大個Balenciaga字樣的專櫃，原來係賣另一個又係巴黎又係世家的……嘻……嘻……嘻……皮爾卡丹PierreCardin，仲係懷舊七、八十年代款，係咪好爆呢？你咁鍾意vintage嘢，啱晒你啦！
VINCON
結果全巴塞隆拿我最喜歡的店是VINCON，與時裝無關的是和我至愛TheConranShop一樣賣傢俬與家居用品，開業超過30年，由披索賣到歐羅，經歷了幾十年的家具文化與社會轉變，如今仍是地方舒服，買手鬼馬，貨品有型的家品潮店第一位，我今次的bestbuy是張扮波斯地毯的mousepad和以為自己是雀仔的晾衫夾。
懷疑我前世是Gaudi
呃咗大家咁耐，對不起，今次我來西班牙的最大目的，是看Gaudi。
以為自己最愛CasaMila（後易名LaPedrera），來到才知道CasaBatllo更接近我的soulmate，聖家大教堂的發育期長達過百年，現在臉和性格都沒有長好，不敢武斷排名第二還是第三，但魔幻現實基本上最我杯茶，尤其當我知道這批現代人仍不斷參考借用的設計，其實已落成差不多一百年（或再多），心裏冒出了這樣的異想：如果我6歲時有人帶我來巴塞隆拿看一看我這三天所見的，我一定會變了建築師，可能是個渣的architect，但絕對不會是今天的賣字人，你現在看的東西應該來自我的blog而不是報紙專欄，所以如果你喜歡看我的東西，請多謝那個童年時沒有帶過我來西班牙的人，通常，我猜這表示我的父母。
咁黃生黃太你哋呢幾日出街唔該小心啲喎。
所以你哋呢班做父母嘅，得閒記得帶啲細路出多啲街去多啲唔同嘅地方畀多啲嘢佢哋揀啦，唔該。
Textby黃偉文
本周插曲：
在CasaMila天台拍攝留念時，忽然聽到大批操韓文的男男女女，他們見我是東方人，不斷監視窺看我的照相機，到底拍了甚麼？頗有如臨大敵的氣氛，哦原來是個韓國女明星咁啱今日又來拍攝CasaMila，怕我們是講廣東話的狗仔隊，但我呢，就噏極噏唔出佢係邊位，咁大支嘢，劉偉恆和一切哈韓者，請幫手認認到底佢係乜水？
