唱作組合at17一向以歌聲做賣點，前晚應邀出席《蘋果》網站直播節目《娛樂開CHAT》，現場與讀者大唱特唱，可是林二汶抱恙甩底，只得由拍檔盧凱彤（Ellen）獨擔大旗，但她仍表現淡定，樂於跟讀者透過視像互動唱歌和聊天。Ellen更帶了閨中密友Fanny和Daphne齊齊亮相，分享at17早前在新加坡演出時的難忘事。
讀者大唱at17的多首好歌，Ellen又細心地跟視像互動的讀者和唱，彼此合作甚有默契。來自旺角的加祺演繹一曲《TheBestIsYetToCome》獲Ellen大讚有天份。Ellen談到跟林二汶共同擁有的座右銘時說：「一齊都係最美好嘅安排，最美好嘅仲未來臨，無論遇到ups&downs，甚至好大打擊，一切都為將來更加好。」大家可登入《蘋果》網站 http://ent.appledaily.com隨時重溫節目。
採訪：懷鈺、林惠卿 攝影：葉君海
試過沉溺悲情歌 黃大仙阿晴
阿晴：你哋有冇試過唱完首歌後俾首歌影響到，兩個同時覺得好唔開心，好失落？
Ellen：有呀！我記得錄《LostinLA》呢隻歌，應該係我哋錄第二張碟嘅時候，呢首歌係林一峰作詞作曲，我哋係用一個好沉重嘅狀態去錄，我記得我哋錄完之後坐咗喺舊公司一條好舊嘅冷巷度，大家有10分鐘都係相對無言，因為實在俾嗰首歌嘅魔力感染到我哋，完全唔識講嘢。當時有種好抑鬱嘅狀態，我相信有啲歌係可以有呢種感覺，但唔可以沉溺喺嗰種感覺太耐，所以我哋到時到候都要講吓笑，或者唱啲開心嘅歌。
滿足感勝過金錢 沙田Chole
Chole：如果你做音樂，得唔到名氣，得唔到錢，你會唔會繼續做？
Ellen：得唔到名氣同錢，我相信唔代表乜嘢都得唔到。我會繼續做音樂，因為你做每一個行業都希望會得到名氣同金錢，就算係做OL，你都希望boss會賞識你，同得到一份好好嘅人工。
但點解兜兜轉轉我都想做音樂呢一行，就係如果你喺台上表演時，或者你錄咗一首歌，又有人讚你嘅時候，嗰種滿足感係好大嘅，因為你係用你好鍾意做嘅嘢去換取一啲人嘅認同，呢份工作得到嘅滿足感係其他地方好難畀到我嘅，所以我唔係好擔心名氣或者金錢，除非係餓，但就算真係餓，我覺得都可以做幕後賺少少錢。
Chole：你覺得之前做舞台劇好唔好玩呀？
Ellen：好玩，你有冇睇呀？
Chole：買唔到飛呀，所以睇唔到。
Ellen：上年同林一峰做咗個《一期一會》舞台劇，真係好好玩，以前就只係得我同二汶玩，但呢次係有一大班人，成班人每日都對住，你就會覺得成個團體精神好強。
即興自彈唱新歌 新加坡美珍
美珍：剛剛你們來新加坡開演唱會我都有去看，我很喜歡你們的表演，我跟我同學從上學開始就很喜歡你們，你們的書和專輯我們都有買。
Ellen：你最喜歡我們那一首歌？
美珍：我喜歡你們在過去表演唱的《流浪到彼岸》。
Ellen：這是一首新的國語歌，我們還沒在香港公開演唱過，你可以唱幾句嗎？
美珍：我記得歌詞，但不太會唱。
Ellen：呢首歌其實我哋連入Studio都未做，就喺今次新加坡演唱會率先唱畀大家聽，想睇吓個反應如何，點知大家都鍾意，我現在就演唱畀大家聽吓啦！（現場獻唱）
愛上攝影出相集 旺角加祺
加祺：我想問你之前出咗本相集，咁你仲想唔想出多本？
Ellen：想啊！其實𠵱家一直有收集我嘅相，我自己有寫blog，起碼我未出書之前每個禮拜都會更新啲自己影嘅相，同埋我發現自從出咗上次本相集後，我越嚟越鍾意影人同貓，我會特登捐窿捐罅去搵啲流浪貓嚟影。我下本相集未必會喺今年出到，但希望喺下年會出到一本多啲關於貓動態或者靜態嘅書。
