二月二十五日，到金鐘香格里拉酒店參加科威特國慶日酒會，未入到酒店，已經見唔少CC（領事車）牌汽車在外接領事鬆人，亦見到幾位議員離場，以為自己遲晒大到，急急走幾步，入到大宴會廳門口，警務處長鄧一哥迎面而至，原來佢又係夠鐘鬆人。
入去企定定，知道仲未奏科威特國歌，咁就唔使咁緊張啦，飲杯茶，周圍張望吓先。大馬主即刻行埋嚟問：「一哥呢？係唔係已經走咗？我想問佢有冇浪費警力，要出動二百人圍住陳冠希呀？香港市民好需要警察維持治安啫！」大馬主原來對陳冠希好有意見，一啲都唔接受佢嘅道歉，唔知係唔係佢啲仔女問佢有關「淫照」，問到佢發𤷪呢？
一哥既然已經走咗，無謂追問啦。儀式舉行完畢，祝酒之後，揸住碟蛋糕，碰到一位消息靈通人士，於是向佢重複大馬主之問題。消息人士話：「你哋唔好誤會至得㗎。二百警員並非保護陳冠希，而係務求陳冠希可以迅速離開，返屋企。警員要有陳冠希在場，得佢私人同意，從佢家中拿走五部電腦，以助查案。大家想做事快趣啲啫。以前試過有小甜甜爭產案，小甜甜欲離開現場時，太多記者阻住，仲有記者坐在馬路上唔俾小甜甜開車離開，擾攘多時。呢次警察唔想再有二百名記者阻住陳冠希走人啫。」
咁講法，煞費苦心喎。可惜市民得到嘅印象係警察過份重視陳冠希，出動二百名警員保護！現在警察既有陳冠希啲電腦在手，資料有齊，應該可以做番齣好戲喇啩。
食完蛋糕，行埋去自助餐枱斟一杯咖啡飲，誰知味道辣辣地，飲半啖立即放低。問男侍應：「此是何物？」答曰：「科威特特產咖啡！」唉吔，味道完全唔啱左丁山飲，唔敢嘗試。科威特最出名之產品當然係石油，油價達一百美元一桶，科威特負擔得起揮金如土，佢哋至今立國四十七年，要多謝最多事之美國人干預內政，喺第一次波斯灣戰爭，派兵到科威特趕走薩達姆嘅伊拉克兵，免科威特亡國之恨。美國之有愛於科威特，當然係因為石油啦。