陳豪昨日重操故業以模特兒身份行騷，笑言自去年成為視帝後，工作未停過，他更有意效法緋聞女友廖碧兒買樓投資，希望可以儲夠八位數字買「豪」宅，成為他的投資新興趣。
陳豪昨日以模特兒身份，與熊黛林等在中環ifc為瑞士時裝品牌Bally行騷，重操故業的陳豪表現駕輕就熟，他說：「今年好忙，由初一到今日都有工作，相信係承接獎項帶嚟嘅喜悅，之前又登台行騷，𠵱家又拍緊《溏心風暴2之家好月園》。」問他會否效法緋聞女友廖碧兒買樓投資，他笑笑口說：「睇法一樣，買股票都唔知幾時係最高同最低，最好就係買樓，做藝人都有時間handle，係我新興趣之一。」
心痛碧兒受傷
問現在有否物色豪宅，陳豪說：「陳豪嘅『豪』，自己𠵱家有一層物業，睇下自己有冇能力，做藝人咁辛苦，都想買一間夢想嘅屋獎勵自己，為自己鋪路。理想嘅單位都會係八位數字，買樓唔係一時三刻嘅事，要睇時間，希望快啲。」
記者笑陳豪有否相約廖碧兒一齊睇樓，他說：「冇，各有各忙，佢拍緊古裝戲，上次見佢隻手都瘀咗，不過唔緊要，拍得開心咪夠，最緊要健康同開心，開心同面色係成正比。」記者即笑他面色好春風滿面，他說：「我血行得快，呢個係我優點，亦係我缺點。」
悠閒熱帶風情
此外，Bally今年春夏系列由創意總監BrianAtwood操刀，以悠閒之旅出發，當中不乏印花圖案，靈感來自於伊斯坦堡托卡皮皇宮，並沿用維多利亞的淺色色系，用料則是輕柔透明的雪紡，表達熱帶風情。
採訪：LawWaiMan
攝影：MatthewLam
