發哥經典作《監獄風雲》享譽影壇，好多人對戲中惡形惡相嘅懲教員印象深刻，現實中懲教員梗係唔會兇神惡煞，除咗要看管犯人，原來仲要防範神出鬼沒嘅死神探監，壓力甚大。懲教署懲教事務總監督、赤柱監獄「一哥」楊炳榮噚日同八方講，赤柱監獄每年大約有15宗囚犯自殺個案，去年有14宗，當中9個用床單掛喺鐵窗欄杆吊頸，其餘就用利器，甚至生吞電池自盡，幸好懲教員機警，救番晒14條命。
見完至親鑽牛角尖
閻王要你三更走，不可留人到五更，懲教員點解神通廣大可以向死神sayno呢？楊sir話其實一半自殺囚犯唔係嚟真，至於其餘一半，多數有迹可尋，懲教員只要留意囚犯日常行為，就可以救人一命。
失去自由確係好絕望，程翔都諗過自殺，楊sir稱囚犯自尋短見，同要坐幾多年監冇乜關係，反而睇完家書、見完家人、太太或女朋友之後係高危期，好多人會一時睇唔開鑽牛角尖，諗埋一邊就出事。為咗防止囚犯自殺，楊sir透露懲教員夜更每隔20分鐘就會巡一次倉，睇吓裏面情況，又會不時評估邊啲囚犯有自殺傾向或異常行為，同時有份醫療監察名單，跟進有自殘傾向囚犯情況。
佢話平時收風好重要，更舉例話，有次一位囚犯將成個月喺工場辛苦做嘢賺嘅工錢買晒餅亁、糖果，然後分晒畀囚友，有職員覺得唔對路即時做嘢，之後喺佢個倉搵到兩封遺書，個犯坦言想向死神報到，經一班手足費盡唇舌先勸服佢，喺鬼門關行番轉頭。
懲教員有把救生刀
不過唔係次次咁好彩，有時遇有犯人上吊或自殘，懲教員要即時應變，楊sir話一班手足接受處理突發事故訓練，每個懲教員配備一把由外國引入、名叫「911救生刀」嘅開合小刀，可以割斷吊頸嘅床單或繩索，呢把刀刀鋒向內，唔容易傷人，只會救人，係真正「善良的刀」。
如果真係出咗事，會急call最少七個人員增援，孭埋急救儀器大約五分鐘就可以趕到現場，楊sir好感慨咁話，同閻王搶人唔係咁輕易，有時要講運氣，可能差一、兩分鐘已返魂乏術，若果個犯決心跟死神走，佢哋都隨時無符。
mailto:[email protected]