TVB高層嫁女媲美台慶<br>Toby伴家姐出閣「以為自己嫁先」

TVB高層嫁女媲美台慶
Toby伴家姐出閣「以為自己嫁先」

無綫製作部總監(戲劇製作)梁家樹的大女兒Bonnie前晚出閣,場面熱鬧又溫馨,有如無綫台慶一樣大陣仗,因一眾無綫小生花旦均畀面到賀,其中做伴娘的梁靖琪(Toby)更為家姐開心到狂喊,一對新人在酒店內進行結婚宣誓儀式。

前晚無綫高層梁家樹和蕭笑鳴嫁女,在四季酒店設下32席喜宴,新娘子Bonnie與新郎哥因為並非圈中人,故不設採訪拍照,到賀的一眾小生花旦全部是由梁家樹一手栽培出來的,包括羅嘉良、宣萱、汪明荃、薛家燕(好姨)、張家輝、關詠荷、吳卓羲、林峯、古天樂、馬德鐘夫婦、滕麗名及陳妙瑛等,好姨與汪阿姐更打扮到紅噹噹如利是封般。

Toby(中)為家姐擔任伴娘,鄧穎芝(左)和吳日言(右)則擔任姊妹團。

馬德鐘高調到酒店門前迎接太太,表現恩愛。

贈逾10萬元鑽戒

伴娘由新娘子的妹妹梁靖琪擔任,姊妹團有李珊珊、吳日言及鄧穎芝等,陳山葱及羅敏莊則擔任司儀。據場內嘉賓透露,婚禮上有現場樂隊伴奏,佈置豪華,Toby在台上致辭表示,她與家姐的感情要好,有時會一齊睡覺及冲凉,她實在很不捨得家姐,說罷更忍不住喊起來。
事後Toby接受記者訪問時說:「雖然係家姐出嫁,不過我心情仲緊張,因為呢次婚禮係我一個策劃,我送咗一隻價值六位數字嘅鑽戒畀家姐,初時仲以為自己嫁先,點知係家姐嫁先,唔緊要啦,我慢慢揀如意郎君。」
另外,擔任姊妹的李珊珊說:「同新娘子Bonnie係交心友,今次係我第一次做姊妹,我哋冇難為新郎哥,不過要求佢唱吓歌,講吓愛的宣言咁,新郎哥好錫太太,我冇諗過要嫁,呢啲嘢唔可以隨便,戥人開心都一樣。」

曾是無綫當紅花旦的陳妙瑛,前晚盛裝出席婚宴。

無綫高層樂易玲單刀赴會。

好姨心急做外母

好姨則說:「呢排有好多朋友結婚,一個月內飲幾餐,我都有諗吓自己個女幾時嫁,不過唔好畀壓力佢。」嘉賓陳妙瑛說:「我同新娘子好熟,見到人結婚,但我唔恨,皇帝女唔憂嫁嘛!惟有戥人高興,本來我去咗歐洲,不過為咗飲呢餐喜酒去唔到。」
採訪:卓寶花 攝影:陳俊強