老牌出版社博益突然執笠，猶如喺文化界投下一個重磅炸彈，一批作家慘成無主孤魂，新書出版無期，最弊連版權都攞唔番。喺文人一片哀鳴下，博益所屬嘅南早集團老闆「糖王」郭鶴年終於高抬貴手，同有約在身嘅作家解約，等佢哋可以「投胎」其他出版社出書。
下令盡快了斷事件
作者權益關注小組召集人伍諾韻，噚日代表30幾個博益作家到南早集團攞解約文件，佢話小組最少有十幾個會員同博益簽咗死約，解約後可以攞番未出版書籍版權，如果好彩即時搵到處好人家落腳，仲趕得切喺今年7月書展前出版㖭。
至於已印好嘅存書，據伍諾韻引述南早高層講，大老闆郭鶴年早幾日開金口，指令下屬盡快搞清楚版權問題，了斷事件。博益作家初時搵卿姐同梁家傑幫忙，代表文化出版界嘅小霍初時隱形，俾人鬧完知衰，急急搵郭鶴年講數，卒之搞掂。
南早集團發言人表示，下星期會開會研究如何處理舊書存貨，其中一個方案係書展時散貨，收益捐作慈善。博益執笠應該唔會參展，據知母公司南早集團已租攤位，雖則縮咗水唔係好大，但應該夠用嚟散貨，總好過全部銷毀咁絕吖。