立法會西九管理局條例草案委員會首次開會，第一件事要選舉主席，自由黨田少講過「得西九，得天下」，就算係審議草案委員會主席都兵家必爭，而且政府想盡快通過草案，梗係要保皇黨護航，所以噚日雖然名為選舉，實際上只係一場戲，自由黨副主席周梁淑怡係花旦，依足劇情做主席，男主角則係民建聯張學明，當選副主席。
生、旦「內定」，公民黨梁家傑正、副主席都落選，只能做個閒角，好彩唔使做白臉丑角。保皇黨一早講掂數，梁家傑話預咗冇運行。周梁浸淫娛圈多年，係阿姐級人物，唔學似新晉姐仔咁批踭攝位搶鏡，甫開會先讓梁家傑solo十幾分鐘，畀足機會你出風頭，唔好話阿姐蝦你呀。