幾位未讀完小學，未讀完中學嘅老友來電，問佢哋可否申請做廣播處長，呢幾位朋友全部自幼家貧，十幾歲就出社會做事，至今成就唔錯，有一位仲做咗大老闆㖭。大老闆當然唔認為廣播處長月薪十六萬，係一份「筍工」，佢自己買隻遊艇都成四五千萬啦，不過佢睇完電視直播周融記者招待會，忽有所感，想話做處長過吓癮。份人工佢可以唔要，或者攞咗就捐番畀香港電台。左丁山梗係話好啦，如果佢哋一齊遞表，馬局長一定頭痕。後來諗吓，咁樣玩局長，玩特區政府，非我哋溫柔敦厚之中國人所為，勸佢哋作罷。
有一位傳媒老友心水清，話馬局長露咗口風，講到浸會畢業嘅傳媒人都係冇學位嘅。莫非局長心中已有人選，未來廣播處長係浸會書院（注意：不是浸會大學）傳理系畢業生？會係邊個呢，浸會校友有文憑而唔算有學位嘅，又在電子傳媒有豐富經驗嘅，數手指就有有線趙應春，無綫袁志偉，商台陳淑薇，港台嘅明偉儀、梁家永、亞視關偉與梁家榮，唔知政府會揀邊位？
馬局長對記者講：傳媒事業有特殊情況，不少資深的傳媒工作者均沒有學位（暗示浸會香港傳理系畢業生），而傳理學系學位亦是在近十多年才出現，因此要就業界的特殊情況作相應嘅修改。
馬局長呢番說話只啱一半，唔啱得晒。本港政府幾十年來對學位之定義好嚴格，浸會城大理大嶺大升格前之畢業生只有文憑，沒有學位。中文大學新亞書院早在一九六七年已有新聞系畢業生。「傳理」只係在八十年代先至流行嘅名詞，由浸會余也魯（後到中大做新聞系主任）大力推廣先嘅。中大新聞系嘅畢業生老早係有學位嘅資深傳媒人，譬如六十年代嘅倫兆銘、梁天偉、黃德貽、吳明林，七十年代嘅關越強、鄧偉雄、黃繼昌、鄭麗敏、梁業昌、蕭景路、羅燦、馮強；八十年代嘅陳慧兒、張國良、張結鳳、陸錦榮、梁鳳儀、盧永雄、蕭世和、張劍虹、馮德雄、黃麗君、盧愛玲等等，多到數唔晒，佢哋當然唔係最近十年才有學位的傳媒人，或者馬局長嘅新聞秘書唔記得咗啫。