新款GT-R到港差不多3個月，講到悶未？未！你都未買，點會悶。今日紅白黑炭灰銀集齊一套，加埋6球幾嘢二千幾匹喺將軍澳飆住拉龍，未見車，咆哮聲已經震撼工業邨，我仲以為自己去咗侏羅紀。6色𠝹埋身，即時引嚟好色之徒，當中仲有啱啱登陸、全港唯一嘅火紅戰神，我忍唔住「太極」樂隊上身：「留下這打火機，在車裏。」
撰文：嘴嚼爺
攝影：譚盈傑
鳴謝：富利堡、TypeRClub
6色漫遊工業邨
除咗打PS3隻《GT5Prologue》，我諗都冇乜幾可喺街道見到一連6架新款GT-R，6隻唔同色嘅GT-R停喺公司門口集合時，收視率真係爆燈，逢人經過都指指點點。今次咁大陣仗6車出動，梗係要影番張壯觀拉龍相。為咗呢張相，戰神們喺將軍澳工業邨進行繞圈賽，最慘係車速唔可以快，難為咗一班車行嘅車手。
講起車手，佢哋又要同客試車，又要揸出嚟畀傳媒影相，同GT-R嘅熟絡程度隨時深厚過買咗車嘅車主們。慢車繞圈咁鬼悶，佢哋就話因為呢一代GT-R係半自動波，已經慳番唔少轉波踩極力子嘅力氣。之前已經體會過戰神嘅驚人加速力，今次反而知道佢嘅舒適性，好適合喺市區Hea住揸。6色GT-R各有各靚，想親身感受吓有乜唔同，不妨今、明兩日到尖沙嘴新世界中心嘅富利堡車展昅昅，即場會有22部現貨以$998,000優惠價發售。
色情男女
你最紅
「GT-R呢期最紅！可能女仔會鍾意紅色多啲。雖然我本身唔係太鍾意紅色，不過我覺得呢架紅色GT-R會斯文過黑色灰色，反而無咁重辣味，高貴少少。不過我就唔鍾意個淺色Seat位，都係黑色好睇啲。」
閃銀光
「坦白講，第一眼的確俾紅色搶晒，但係望到銀色時，眼光卻不斷流連，無法啦，好耐都無一種銀色真係咁閃咁亮，最正仲要係呢種銀，係經過納米技術特製，再多沙塵又或洗車都唔怕變花臉貓，正！」
白天使
「親身第一次接觸就係白色車身襯黑色鬼面罩，印象難忘，講搶眼度絕不輸給火紅版。而且總覺白色帶點公子哥兒斯文Feel，2波踩油未升3波已有飛機起飛之感，甚有化身天使俯視凡人之意境！」
慢慢炭
「呢隻色較少有，襯埋套黑軨好靚。試過GT-R後感覺好易操控，而且架車好快，印象最深係個Brake好勁，易放易收，而且波箱好聰明，反應快過我架M3，有機會真係想揸多次，慢慢嘆吓架GT-R。」
大灰熊
「我覺得灰色係最惡嘅，而且呢隻色先似番架跑車，紅、銀、黑呢類色太似普通私家車喇。車身橫向極具霸氣，疾飆起嚟好似隻大灰熊追捕獵物咁，勁有氣勢！」
黑澤明
「黑色車襯銀灰邊真係好靚，光澤令面、線條明朗，跑車要咁嘅款先有型。呢架車外觀上真係改無可改喇，咩都落齊，連條胎都係靚嘢。雖然佢係四驅同半自動波，但唔會影響玩樂性，因為波箱太聰明喇。」
紅色的跑車
唔知係咪俾「太極」首歌影響咗，一向覺得紅色的跑車一啲都唔神秘之外仲幾鬼老套。不過，今次見到呢架火紅戰神又唔同講法，可能喺街見親GT-R唔係黑色就藍色，再唔係就白色，悶到爆，所以呢架紅色感覺好搶眼，而且車頭嘅風口、側面裝飾都分別係碳纖灰同銀色，襯上鮮紅更加突顯到新車嘅線條。打開機，都係覺得GT-R個車尾有型，今次鮮紅襯番四盞紅色煞車燈，一啲都唔娘，等我返屋企都將GT5P部車轉紅色先！
車廂內櫳都有驚喜，一般人要襟用要襟污糟，有得揀，都必定揀黑色皮椅。但係你揸得GT-R，梗係要突出行先，呢架紅色GT-R就示範咗用淺灰皮Seat有幾型，坐上車都無咁懨悶，更加多咗幾分貴格感覺。
聲厚力猛
最後，新款GT-R性能有幾無敵，無論你係車迷或者GT迷都一定知。加速有幾推背，半自動波箱反應有幾快幾聰明都唔使再多講，反而係今次慢車唔使咁集中精神，有機會留意吓車內陳設，軚盤加減波的確就手，桶Seat包座承托得嚟唔會好有壓迫感，感覺啱啱好。開窗吹吹風，發覺原來隔音真係做得好好，聽真吓佢把聲，就算係慢車，嗰種雄厚感覺都好震撼，呢架唔係特別版無BOSE音響？無所謂啦。
NissanGT-R
引擎：3,799c.c.DOHCV6twin-turbocharged
馬力：480hp/6,400rpm
扭力：60kgm/3,200-5,200rpm
傳動：6前速半自動波箱
查詢：富利堡（28776700）