關詠荷舊年一月產後復出，接拍無綫處境劇《同事三分親》，雖然部劇平均收視維持喺26至29點左右（即163萬至182萬觀眾），成績不過不失，但馮仁昭收到消息，原來關詠荷已經以私人理由同無綫辭演《同》劇，由於佢係部劇主角，今次佢辭演，無綫當然搞到好頭痕。
噚日馮仁昭向監製羅鎮岳求證關詠荷辭演件事，佢大方承認話：「其實Esther（關詠荷）舊年11月已經提出，話做到農曆年尾，想專心湊女，諗緊係咪再生第二個，所以同公司提出放一個長假期，大概九個月至一年。呢個係佢私人意願，我哋當然尊重佢嘅決定，Esther年三十晚拍埋佢最後嗰集戲，我哋都有同佢搞咗個歡送晚會，大家合作非常愉快。」
加王喜撐場
至於劇情會安排關詠荷飾演嘅黃家嵐去外國，但詳情羅鎮岳就話唔方便透露。
問會唔會係關詠荷再有BB所以辭演？羅鎮岳就話據佢所知就唔係，話嚟緊王喜會加入《同》劇：「王喜唔係取代Esther，我哋不斷都有新人加入，Esther走對我哋影響唔大，因為我哋部劇有好多好戲嘅人，好似江欣燕、石修同金燕玲等等。」
對於關詠荷辭演，張家輝噚日喺電話回覆，話老婆同TVB簽咗一年合約，由於個女係成長期，想專心照顧小朋友，所以佢都好贊成老婆決定。