恬妞經歷兩次失敗的婚姻，她相信是上天覺得她的結婚配額已用完了，可能要孤獨終老，老年時伴在身邊的是狗不是男人，奈何23歲的女兒仍想有個弟弟，要求媽咪再婚，但恬妞卻認為男人只會令女人傷心與擔心。
現年50歲的恬妞近年長期在內地拍電視劇，最近她專程來港宣傳新片《奪帥》，久未露面，發覺她的樣子變得更年輕，現今流行打botox，又或是羊胎素駐顏，恬妞堅稱無造人工修飾，她說：「講真㗎！我真係一針都冇打過，一粒維他命都冇食過，你信唔信我，你一定要信我，我自己都唔知點解，唯一解釋係我冇乜煩惱，人生冇男人應該係最悲慘，我事業一直未去過最巔峯，令我仲有好多希望同動力，我都好想喺最紅嗰時退出嫁個有錢人，好多幻想，真係越老越鍾意發夢。」
無法為女添弟弟
恬妞女兒彤彤今年23歲，她說女兒想要一個肖豬的弟弟，當然不能如願了，恬妞說：「我同囡囡講會再努力，牛冇就羊啦！不過我𠵱家冇男友喎，間中拍吓散拖就有，好多女人一世都未結過婚，我一結就兩次，可能個天覺得我已經用晒啲quota，唔知仲有冇機會將來有一日可以同個女一齊搞婚禮呢！」
「拒絕所有男人」
經歷過兩次的婚姻失敗，恬妞說自己受了教訓，考慮老來搬到鄉下孤獨終老，伴在身邊的不是男人而是一隻狗，她說：「男人用六個字就可以形容晒，就係『擔心、疑心、傷心』，呢樣係我送畀所有男人嘅三粒星，我𠵱家有權力去拒絕所有，因為我想要嘅係開心、放心、安心。」
採訪：魯萍攝影：葉君海
