瑜伽總給我有點撲朔迷離的想法，你說這是運動，還是宗教？
從開始時簡單的肢體動作，到打坐冥想的心靈修行，使我越來越感到這不只是運動咁簡單，更有朋友因此愛上印度、轉食長齋！今日，連樓下社區中心師奶都學瑜伽，同我亦覺得一般YogaClass滿足不了。$1,000的明星老師補習班、過萬的蘇梅Retrip旅程，是我未來的目標！
攝影：林栢鈞
http://appleblogpaper.blogspot.com
aboutme:
空姐瑪莉
職業：使錢。唔靚唔愛，唔型唔要。細個見工最大的恐懼係填長處一欄，因為冇。人大了才發覺自己長處係夠八，甚麼東東都可以問一餐。越問得多，越知得多，使錢就越多。
$1,000堂包起黃佩霞
今日到機，以9.9秒速度飛返屋企，放低行李，除低件空姐「超人制服」，之後跑去上堂瑜伽課，以解心身之癮。今次預約了黃佩霞老師（Almen，PUREYOGA）一對一上課。要預約老師單獨教授，比起普通課堂貴6倍，一小時單堂計算約$800-$1,000，買得多一樣有平得多的套餐優惠。
想轉玩單對單，當然唔係為了親親明星咁幼稚啦。學了一年瑜伽，除了筋骨鬆弛，更逐漸進入心靈合一的境界，我一向跟開兩三個老師，搵老師係希望更直接、清晰的指導。當然，不少名人希望有私人空間，都不介意花多一點。「有個學生，每次來上堂都會帶埋女朋友同保鑣一齊嚟做，睇得出保鑣哥哥身手好，但因為唔敢表現得比老闆好，好多時都要就住做，情況都幾搞笑。」
上團體班，同幾十人分一個Miss，對我嚟講真係唔夠喉，相反單對單，每分鐘都係我嘅，$1,000邊算貴啫！據知鍾麗淇（修身堂）都會加入單對單教瑜伽的行列，收費同樣約$1,000一小時。有機會包起明星瑜伽老師上堂，講畀人聽又真係特別威，呢個都係其中一個原因，哈！
過萬元海外修行
初玩Yoga好多人都只當係一種運動，特別係高溫瑜伽，只當係減肥玩意！計我話，要減肥你不如去跳纖形舞啦！Yoga玩咁上下，就會變成一種修行，近似中國氣功。瑜伽本出自梵文，有結合、統一的意思，古代印度文化意即通過修行達致天人合一的境界，將身、心、靈昇華。
本小姐終日於機上搬搬抬抬多件行李、推住200幾磅的餐車前前後後，瑜伽的確對身體放鬆、舒展有好大幫助。學了一年多，訓練更有助改善我急躁性格。不過要談到再高道行的身心靈修行，自問暫時有心無力。我的確係一個不肖弟子，瑜伽令人用心可以控制身體任何動作、任何想法，可能我本性差，未咁快達致如此境界啦。
不過迷戀瑜伽的師兄師姊大有人在，好似一個於中環任職CEO的朋友，佢可以放棄工作，到蘇梅島Svantantra參加一個Retrip的瑜伽鍛煉，費用大概萬幾蚊。整個旅程唔係去嘆去玩，無論作息定飲食，都由老師全程安排。由朝到晚的瑜伽練習，還大叫百般享受。另外亦有個同事因為瑜伽迷上印度，還計劃用長假到印度體驗這個高智慧的民族。花金錢，他們不志在；花時間，可能叫他們萬般痛苦。瑜伽卻有如此力量迷到眾生。
留港一樣可以上Workshop
從逐步逐步向高難度動作的試練，會慢慢養成挑戰自我的生活態度。聽落好似好誇張，但道理就好似打機一樣，當你過了第一關，自然就會有挑戰第二版的動力。由起初嘗試五花八門、各不同學派的瑜伽，到選定自己喜好，當你逐漸投入修行，總叫你有一種心癮。
打得屋企部遊戲機多，都會想打吓街機挑吓機。我下一個目標就係參加一些WorkshopClass課程，學校會邀請一些世界級明星瑜伽導師任客席老師，大概$3,000的課程，將一個星期六日變成密集式課程。對我嚟講，就簡直係朝聖課程。例如即將來港的AndreyLappa、DavidLife及SharonGannon等，都係現今幾個瑜伽學派的代表人物。我幻想，如果再畢業的話，到最後終極修行當然報讀導師訓練課程，話唔定到時係我教單對單獨立班！雖然瑜伽毋須註冊的教練牌才可做教練，但若到美國考教練牌都起碼要US$5,000。漫漫長路，我無咁易放棄。
最新回應
Elbi：我都有玩過一段長時間，但𠵱家就停咗，因為覺得做瑜珈的人越來越雜。又師奶又學生哥，好嘈好亂，影響咗質素。單對單課程好似都幾好，有多一兩個朋友一齊去都唔算太貴，起碼樣樣都自己控制。
Joan：之前試過兩次高溫瑜伽，頂唔順，暈咗。我都會想再試吓玩番其他瑜伽，但只會當運動，完全冇諗過用瑜伽變成咁高層次嘅思維靜修。
小儀：玩瑜伽令到我對印度完全改觀，我真係鍾意咗印度呢個地方。我本來舊年都計劃過去印度上啲瑜伽課程，因為時間安排唔到而擱置咗。今年我一定會再安排同埋一班同學去，順便參加我嘅印度老師嘅婚禮。
相關超連結
http://lindaf02.mysinablog.com/index.php?op=ViewArticle&articleId=910132
網上有大量關於瑜伽運動的討論，有人更將一些簡單的動作畫成得意有趣的動畫，Click一下就可清晰睇見如何完成整套動作。未試過瑜伽的朋友不妨跟這些動畫試吓玩，但就要小心呼吸及拉傷。
http://www.livingyoga.com.hk/
瑜伽大熱，海外及本地的瑜伽中心網址多得氾濫。有瑜伽發燒友介紹這個LivingYoga網址，因為有瑜伽老師會親身跟網友交流某些動作技巧，有時更會教大家煮印度美食。
查詢：PUREYOGA（81291188）
鰂魚涌太古坊林肯大廈4樓
修身堂（21168328）