李嘉欣昨日獲重金禮聘，到澳門出席珠寶展，她戴上價值600萬美元（約4,700萬港元）的鑽飾，席間被老闆突擊出手觸摸掛在胸前的吊墜，令嘉欣大吃一驚。而收慣重禮的嘉欣，坦言從不介意男友許晉亨送禮價值多少，即使要用顯微鏡睇的鑽石也樂意接受。
李嘉欣昨日應邀到澳門出席國際珠寶鐘錶展活動，她分別戴上兩套貴重首飾，包括價值600萬美元（約4,700萬港元）的鑽飾，及一套價值40萬美元（約311萬港元）的鑽飾，珠寶商老闆對借出的鑽飾甚為緊張，當嘉欣戴上影相之際，老闆突然出手觸摸她胸前的鏈墜，嘉欣即被嚇到，一臉尷尬。
「有少少愕然」
事後嘉欣接受訪問時說：「我都有啲驚訝，少少愕然，不過佢冇掂到我，佢只係緊張啲鑽飾啫，我只見到啲記者金睛火眼咁望到實。今次大會冇送鑽飾畀我，因為我有收酬勞。」問她可有睇中鑽飾要Honey許晉亨送贈？她說：「佢送乜畀我都冇所謂，就算十分一卡都當寶，開心指數唔使用卡數嚟衡量，有幾十卡都不及送十分一卡，即使要用顯微鏡睇都開心。」
問嘉欣可有收過男友開心指數高的禮物？她笑說：「暫時冇收過要用放大鏡睇嘅禮物，佢成日都送戒指畀我。」
早前嘉欣與男友亨亨去看演唱會，有報道指兩人情不自禁咀嘴，嘉欣說：「唔記得有冇咀喎，只拖手啫，乜嘢叫拍拖呀，做任何嘢都俾人話，喺屋企俾人偷影，出嚟唔係錫就啜，有乜問題呀！」
結婚按部就班
問嘉欣可有與亨亨影過極度親熱的照片？她說：「咁又冇影過呢啲。」談到結婚計劃，嘉欣表示男友講過要按部就班，有計劃自然會向大家講。對於有傳他們在外地結婚，嘉欣說：「我係單身，冇喺外地結婚。」
採訪、攝影：魯萍
