何超儀將於後日（下月2日）在九龍灣舉行首次個人演唱會，心情既興奮又緊張，在演唱會中除了與觀眾瘋狂一晚外，還會獻唱陳百強、張國榮和梅艷芳的金曲，三人對她的人生影響甚深，其中陳百強更是她的契爺，故藉此向他們致敬。
何超儀跟陳百強、張國榮和梅艷芳之間有着微妙關係，不講不知，陳百強是超儀的契爺，她日前憶述兒時跟契爺相處的情況時說：「契爺係個好有品味嘅人，佢好貪靚，貪靚到要連路邊嘅人都靚埋，以前佢成日話我着衫唔掂，成日帶我去買衫，衣着方面影響得我好深。不過佢除咗着衫有品味外，連對音樂都一樣，所以今次演唱會我揀咗《等》呢首歌，但就重新編曲嘅，將首歌變到喺浪漫與死亡之間，我相信契爺若果仲喺度，佢都會好鍾意呢個改編，因為佢係一個好前衞嘅人。」
電人被張國榮鬧
至於哥哥張國榮，原來超儀極迷戀他，她說哥哥人很好，最難忘是第一次跟哥哥見面就被他罵到狗血淋頭，她說：「我記得十幾歲時，哥哥開完演唱會後喺disco慶功，我求咗家姐（何超瓊）好耐先肯帶埋我去，但去到得我一個小朋友好悶，咁啱嗰度有個『電擊燈球』，即係我放隻手喺個球度，然後我掂另一個人，嗰個人就會俾我電到，我覺得好好玩咪係咁電人囉，點知電到黎小田，佢覺得好痛，之後就同哥哥講，哥哥知道係我做，即刻走過嚟鬧我，話我好無聊。不過我俾佢鬧都覺得抵，係我錯嘛。」
終找到自己的路
超儀最欣賞阿梅對工作的態度，她也不時提點超儀，做這行要膽大，要對自己有信心。超儀談到今次是她第一個賣飛演唱會，她說：「真係想佢哋知道我搵到自己條路喇，做咗啲成績出嚟，好希望佢哋睇到。」
採訪：胡比 攝影：仇志德
場地：MarcoPoloGatewayHotel
Makeup：KarryWong
Hair：BenLi@ICHIHair
服裝：I.T（DoublePark）