Net人昨日刊出〈老闆金句〉一文後，收到simpleOL的e貓，將其個人網誌中〈發噏風金句（信者失救）〉公諸同好，句句押韻。
其中打工仔金句語錄有：「一夠鐘，即刻鬆」、「A字膊，唔使搏」、「開工發緊夢，收工一條龍」、「開工瞌眼瞓，收工好精神」……。「OL辦公室策略」則有「姐前姐後有風險，自稱小妹擋飛劍」、「茶水亞嬸要畀面，奶茶加料你唔掂」、「老細秘書誇啦啦，唔想炒魷讚吓喇」，真是面面俱圓得交關！至於「靚秘書語錄」就更絕：「老細夫人巡到嚟，背心短裙要收起」、「扮吓端莊唔使死，升職加薪預埋你」。
「擦鞋仔雋語」又有：「周身郁，扮忙碌」、「電話響，搶住聽，扮晒勤力佢最精」。嘩！真是大開眼界，難怪網友大讚「simpleOL教金句，發達上位全靠佢」。
http://hk.myblog.yahoo.com/jw !F6KDjEeCERmJ0_ysvrZIArIz3w--/article?mid=3587