百年老店港大醫學院形象急跌，最近喺華盛頓大學請咗個舊生李心平返嚟做新院長，期望佢以「強人」姿態整頓。外表謙謙君子嘅李教授話佢唔會監硬嚟，有名你叫，會「心平氣和」處理醫學院問題。雖然港大醫學院山頭林立，佢話唔會招兵買馬，因為好多教授都係老友，同外科系主任黃健靈更有幾十年交情，萬大事都有得傾。
話荷花池似浴缸
李心平8月上任，近日抵港探路，校長徐立之同院長梁憲孫噚日同佢一齊亮相撐佢。對於醫學院私症混賬、教授告教授等醜事，李心平話唔多了解不予置評，首個任務，「係搞好行政，同我以前喺華盛頓（大學）唔同，以前最重要係搞研究。」
李教授笑言要多謝老父，改佢個名改得好啱，佢份人好「心平氣和」，甚少發脾氣，但唔等於唔係一個強人，會「堅強同effective」解決問題。李教授38年前港大醫學院畢業，太太Mary係同班同學，佢話兩人以前成日喺荷花池拍拖，覺得荷花池好romantic，今次重臨舊地，卻覺得荷花池似個浴缸。個池冇變，啲人唔同咗啫。
外傳李教授做院長獲大幅加薪，佢澄清只係多約兩成，由於要交稅畀美國，實際落袋差唔多，當係報答母校，由美返港，最唔捨得係四個月大嘅孫仔李遠。