陳慧琳（Kelly）、黎明同甄子丹主演嘅新片《江山美人》，下個月20號喺香港上映。黎明同Kelly下個禮拜一傍晚會喺UA時代廣場為《江山美人》MV主持鳴炮禮。
呢次係Kelly第一次拍古裝武俠片，拍咗好多騎馬同武打場面，捱咗唔少苦。問到Kelly第一次演古裝嘅心情？佢話：「因為要重新學習武打動作，我喺拍攝呢套戲前半年就停晒手頭上嘅工作，接受騎術同武術訓練，結果練到周身傷。」
程小東讚勤力
Kelly難忘甄子丹教佢練棍嘅場面，佢同甄子丹就要企喺一塊浮木上用木棍對打，既要講究動作，又要考平衡力，但Kelly都失足跌咗落水，慘變落湯雞，但佢冇唔開心，仲笑笑口話：「雖然我變咗落湯雞，但係導演程小東讚我事前好努力練習，所以武打效果唔錯，而子丹其實比我仲緊張，當鏡頭影住我揮棍時，佢仲喺度向我左右上下咁提水。」
子丹身體靈活又大力，但同Kelly對打，反而打得好辛苦，Kelly話：「我覺子丹要就住我嚟打，打得比我仲辛苦，子丹份人從來唔會喺片場認叻，可能佢真係太勁，深藏不露。」子丹也大讚Kelly肯下苦工學習。