【溫哥華直擊】細雨紛飛下，昨日逾200名親友在溫哥華科士蘭墓園一起送別開心果沈殿霞，專程赴加送肥姐最後一程的安德尊更哭成淚人，坦言十分傷心難過，很不捨得她。顧嘉煇和潘志文等則表示欣宜十分生性，加上眾多親友一起前來送別，相信肥姐在天之靈也會感到欣慰。
肥姐沈殿霞的葬禮於香港時間昨日凌晨2時在加拿大溫哥華科士蘭墓園（ForestLawnMemorialPark）舉行，由於她生前人緣甚廣，昨日到場致祭親友多達200名，包括許多移居加國的藝人，如岳華和恬妮夫婦、顧嘉煇、李婉華、陳庭威、潘志文、劉鳳屏、張翼、張琤、雷安娜，以及孫仲和金霏夫婦等等。
專程由香港飛往溫哥華送別肥姐的安德尊，葬禮後接受訪問時哭成淚人，他邊飲泣邊說：「好難過，唔捨得，呢位長輩咁有貢獻，走得快咗啲，落葬一刻好唔捨得。」問欣宜表現是否堅強時，他說：「OK，難過當然難過。佢大個啦，冇乜嘢特別嘢鼓勵佢，咁多auntie喺度。」
觸景傷情
嘉煇憶肥姐陀欣宜
陳庭威是肥姐契仔，他也忍不住流下男兒淚：「我都頂唔順。我淨係記住契媽最尾同我講嗰句ILoveYou，所以我每次同欣宜見面同佢講句ILoveYou，我個心好安慰、好甜。大家都會懷念肥姐。」陳志雲則說：「我代表TVB致悼詞，加拿大總理同市政府都有代表致辭，欣宜聽聽吓都忍唔住喊出嚟，陳淑芬都好激動。」
與肥姐相識多年的顧嘉煇說：「在我嚟講梗係好難過啦，心情唔係咁好，天氣又差。我想起當年佢陀住欣宜嚟溫哥華生，秋官（鄭少秋）又啱啱離開佢嗰陣，我哋都成日來往。欣宜𠵱家咁生性，又咁多好朋友嚟送佢最後一程，相信肥肥都會感到好欣慰。」移居溫哥華多年的李婉華則說：「肥姐嘅家人叫唔好透露葬禮過程，氣氛好感人、好傷感，個個都有喊，但開心有播番肥姐嘅片段。」前藝人潘志文說：「佢哋都會講啲開心或者輕鬆嘅嘢，所以話唔係完全咁傷感。」問欣宜是否表現堅強？他說：「幾好，越嚟越好。以前比較淘氣啲，𠵱家成熟咗。佢喊住咁講媽咪啲嘢，跟住又笑住咁講媽咪啲嘢，所以唔係咁傷感囉。」
岳華欣慰
「欣宜成熟咗好多」
岳華昨日擔任肥姐葬禮司儀，他在儀式後接受商台訪問時，提到當地天氣很壞：「好似個天都哀悼肥姐，陰雨濛濛咁，又凍。當地嘅皇家騎警，都派出好多人手嚟維持秩序。就算被邀請嘅嘉賓，所有人都唔畀攝影、錄影，連親人都唔可以錄影，都係有家屬委託嘅攝影師嚟拍攝，全部有版權。」問到欣宜的心情可平復時，岳華說：「佢因為呢件事都成熟咗好多，但當然情緒都係好激動，有時講說話都係好悲傷，但係睇到佢自己可以企起身。」
此外，徐小明昨日出席尖沙嘴舉行的香港電視專業人員協會活動時說：「溫哥華訂立肥肥日係一件好事，我哋好多人都戥肥姐開心，香港人都好值得驕傲。」
曾與肥姐合作的李嘉欣昨日出席澳門一珠寶活動時則說：「同肥姐喺電影《Miss杜十娘》合作，佢係一個好提攜後輩嘅長輩，對我好照顧，帶好多歡樂畀大家，如果有時間嘅話，我都好想出席肥姐嘅追思會。」
採訪、攝影：李志明、黃曉程、陳怡
喪禮點滴：開心果老友遍天下
肥肥縱橫娛樂圈幾十載，為人重情重義，與她有深厚交情的好友遍佈全球。肥肥葬禮昨日凌晨在溫哥華舉行，便有逾200親友親臨追思，有些即使未能赴會，也送上花圈遙遠致祭。至於肥肥前年拍攝的節目《友緣相聚》，她走訪探望五湖四海的好友，現在重溫該節目，也令人無限感慨。
喪禮點滴：陳志雲忽過檔有線
各方親友昨到肥姐的喪禮致祭，儀式完結後，安德尊傷心激動，也不顧無綫藝人的身份，以廣東話接受有線娛樂台的訪問，其間更一度表現激動。至於身為無綫總經理的陳志雲，也曾多次在有線娛樂台播出的片段中出現（圖）。
