大市延續升勢，加上較早前渣打集團（2888）業績達市場預期上限，為本地銀行股打下一支強心針，就嚟輪到恒生銀行（011）公佈業績，市場普遍預計恒生盈利有兩至三成增長，鍾意炒業績嘅葵涌黃先生順勢推介恒生。
郭：郭家耀 玲：楊慧玲
黃先生：想推介恒生銀行，因為我覺得佢即將公佈嘅業績會好好睇。
玲：我記得黃生之前喺聯想（992）同東亞（023）公佈業績之前都有炒一轉，博恒生業績好係咪一樣炒得過呢？
黃：今次唔同，上次推介完東亞，見佢公佈完業績後個股價都冇承接，好快就離場，睇好恒生係因為佢冇次按、CDO（債務抵押債券）同SIV（結構性投資工具）產品，幾間大行話恒生盈利有兩至三成升幅，我就估佢有五成盈利。
郭：恒生本身冇次按資產，少咗重憂慮，個市跌咗成萬點嚟講，恒生算係跌少咗，現價140蚊水平，估值唔算貴，加上預期今年有高速增長，估計派息會幾慷慨，對股價有刺激，不過五成增長就有一定難度，但喺呢個位買風險都唔大。
玲：咁黃生你諗住公佈業績之後放，定係長揸？
黃：我諗住公佈業績之後一兩個星期就放，目標價睇番170蚊左右，今次都係短炒算數。
郭：恒生業務主要增長來自內地，香港核心利潤會有增長，不過可能會放慢，黃生睇升五成有啲過份樂觀，近期市況波動，有好多唔明朗因素喺度，現水平買風險唔算大，出完業績去到150蚊左右都有機會，不過一兩個星期之內炒到上170蚊就唔易。
《葵涌黃先生個案》
買入價：143元
目標價：170元
止蝕價：140元
時期：兩星期
俊和發展（711）
受惠財爺基建大計
梁太：財爺預算案話喺西九方面投入二百幾億做基建，所以我推介俊和發展（711）。
郭：過去幾年香港基建股真係好慘，今次財爺公佈嘅計劃的確對俊和有幫助，不過基建項目唔會一時三刻就可以上馬，要用時間去反映。睇番舊年曾蔭權公佈十大基建嘅時候，佢都試過炒到上兩蚊，之後就跟住大市回落。
玲：舊年政府公佈加快基建之後，股價即刻升上去，不過之後回落，現價買有可能坐艇。
梁：我都唔係諗住短炒，今次買入我會長揸一年。
郭：以現水平去買，風險唔算太大，不過就要等佢投標工程，基建上馬之後先可以喺盈利度反映，揸呢隻基建股就要有啲耐性。
《九龍灣梁太建議》
建議買入價：1.13元
目標價：1.7元
止蝕價：0.9元
時期：一年
安踏體育（2020）
內需概念可炒幾轉
李先生：今次我睇好隻安踏體育（2020），內需概念唔會炒一轉就冇，人係無止境買嘢，唔會買完就唔買，加埋內地消費能力不斷增加，內地品牌又開始踏足國際，有追趕國際品牌之勢。
郭：我覺得佢要去到國際水平仲有一段距離，不過內需概念可以繼續睇好，唯一擔心反而係生產成本。油價上升，波鞋都要用到石油副產品，所以對佢成本一定有壓力；第二係人工方面上升，對做廠有一定影響，安踏近期喺8蚊企穩，但暫時見唔到有上升催化劑。可以8.5蚊買入博炒一轉上10蚊。
李：我都係諗住揸半年，喺奧運完之前就放。
《旺角李先生建議》
建議買入價：8.75元
目標價：10.5元
止蝕價：8元
時期：半年
中石化（386）
國家補貼消息值博
Ben：我考慮緊隻中石化（386），佢今日走勢靚，同埋傳佢會有國家補貼，你哋睇呢隻股得唔得？
玲：中石化連續3日出現陽燭，有個圓底，走勢真係幾好喎！唔知有冇繼續上升嘅動力呢？
郭：近期𠵱隻股明顯炒補貼，但係大環境對佢唔係有利，油價上升特別影響佢嘅下游業務。博短炒可以考慮，但係炒政策好多時見光即死，到落實嗰時就會回吐，要識得睇位走。
Ben：咁多隻石油股入面，邊隻最好呢？
郭：我傾向上游業務最重嘅中海油（883），佢上游業務最受惠油價上升，而中石化上、下游業務各佔一半，我唔係咁睇好。
玲：油價企喺100美金樓上，對中石化不利，Ben你點睇？
Ben：乜唔係油價越高，補貼越高咩？
郭：以前公路股都有補貼，但公路越來越多，政府就取消補貼。政府幾時都信唔過，唔好靠補貼消息做長線買賣。
《北角Ben建議》
建議買入價：9.02元
目標價：11元
止蝕價：-
時期：半年