財爺免收紅酒同啤酒稅，紅酒愛好者數碼港管理公司行政總裁楊偉雄噚日同華華講，會即刻將佢喺英國嗰百幾箱紅酒運返香港，咁到時批靚酒會儲存喺邊呢？
楊總裁話，香港有兩個好正嘅酒窖，一個係南區壽臣山嘅防空洞，一個係柴灣嘅工業大廈。後者係全球擺放貴價酒數一數二嘅好地方，更有人擺放遠至1930年以前嘅靚酒。
不過，對於呢類戰前紅酒，楊總裁話唔係咁夠膽飲，因為戰前質個酒塞落酒樽嘅技術唔係咁穩定，有機會入咗啲氣影響酒質。佢自己買嘅酒以2000年後為主，酒價由當初嘅600蚊升到2000蚊，楊總裁仲攞咗300支出嚟喺公司招呼客人。
楊總裁原來17歲已經學識飲酒，因為當年佢係窮留學生，去咗一家西餐館打工幫補學費，由於工作關係，可謂閱「酒」無數。講開飲酒嘅故事，佢話曾經同國內大款（富豪）飲紅酒，成3萬蚊支嘅Lafite，對方竟然溝埋七喜同話梅一齊飲，完全冇晒紅酒醇味，睇到佢眼凸凸。