財爺曾俊華啱啱發表最新財政預算案，話會免去紅酒稅，唔收40%嘅課稅，網友散戶即刻聞到酒香，搵到投資機會，大胃皇喺《香港討論區》度問，紅酒股有冇得炒，可以吼吓中國食品（506）同埋王朝酒業（828），前者出產長城葡萄酒，後者有七成收入嚟自賣酒。
Taising1688話：「老實講，我查過晒啲資料之後，加埋政府公佈咗豁免葡萄酒稅同有意打造香港成為紅酒中心，我覺得828係有前景嘅，唯一擔心係個大市就唔就咁解，若中長線持有應該會有唔錯嘅回報。照睇到嘅數據828係冇乜問題嘅，可能係呢輪股市較為波動，所以多數嘅投資者會走短線獲利。」coolman話：「勁，咁都留意到。」產銷紅酒嘅王朝酒業同中國食品噚日不升反跌，王朝酒業跌1%收2.06元，中國食品跌1.2%收4.9元。