講異能人士嘅美版電視劇《英雄》賣個滿堂紅，《福布斯》亞洲版唔知係咪偷咗佢條橋，喺3月10號嗰期，首次搞咗個亞洲慈善英雄選舉。今次嘅評選方法，福布斯話明入選嘅人士係要最慷慨兼有趣，以公司名義進行捐獻就唔會入圍，一定要係私己錢先至算數。喺呢個條件下，邊啲中港台嘅富豪會入圍？
四叔超人一齊上榜
今回華華先講父女兵團，揸住老竇楊國強啲碧桂園股份嘅中國女首富楊惠妍，兩父女舊年捐咗3200萬美金（2.5億港銀），成為大陸捐錢最多嘅慈善英雄。
香港就自然唔少得兩李，講過會將三分之一財產畀第三個仔──（李嘉誠基金會）嘅李嘉誠，已經捐出同埋承諾捐獻嘅金額合共11億美金（85.8億港銀）。至於四叔李兆基，除咗叫「突然休假」嘅世姪郭炳湘聽阿媽話，亦承諾捐出4200萬美元（3.3億港銀），用嚟改善內地農村醫療設施。
仲有就係言論一向出位，話明會將所有財產（約50億港銀）捐晒出去嘅中原地產老細施永青。台灣方面，當地首富鴻海集團老闆郭台銘，同長榮總裁張榮發亦都榜上有名。
不過，唔係一定要捐得多先至入圍，好似江蘇黃埔投資公司嘅董事長陳光標咁，佢喺97年嗰陣，公司盈利雖然只有20萬人仔，但佢就「豪」捐3萬人仔，到舊年8月陳氏累計已捐咗2.63億人仔，04年以嚟，陳光標連續3年入選全國十大慈善家行列。
李連杰靠名人效應
另外，國際功夫巨星李連杰成立「壹基金」以名人效應籌款都入圍。一句到尾，施比受更有福，大家知道點做啦。
電郵：mailto:[email protected]
亞洲慈善英雄中港台部份名單
‧長實（001）：李嘉誠
‧恒地（012）：李兆基
‧中電（002）：米高嘉道理
‧功夫巨星：李連杰
‧碧桂園（2007）：楊惠妍
‧江蘇黃埔投資：陳光標
‧中原地產：施永青
‧鴻海：郭台銘
‧長榮：張榮發