市場講咗成個幾月嘅中國鐵建（1186）終於今日公開招股，作為今年第一隻以「先A後H」上市嘅新股，淨係香港都集資182億銀，當然要大鑼大鼓，招股活動有咁大型得咁大型。
點知中鐵建嚟個反高潮，噚日喺金鐘香格里拉搞招股記者會，租咗「夏宮」旁邊間普通房，搞到全場一百幾十位傳媒朋友逼爆成間房，好似好墟冚咁。
華華聽公關老友講，呢間房千幾呎，冇乜擺設都可以容納100人，但噚日加埋其他儀器擺設，最盡估計只可以坐到50至60人。
不過，噚日冇一百都有幾十位傳媒朋友到場，公關、投資銀行家加埋又有20至30人，諗諗都知現場幾有逼爆效果。
華華估計，中鐵建唔會因為慳錢而租間普通房，可能因為近期上市公司業績期開始，嫁娶活動又多，好多中環、金鐘酒店都冇場，先至要屈就。換個角度，上市公司慳啲使亦都唔係壞事。