會計師公會個酒會上，財經事務及庫務局局長陳家強都有賞面出席，佢致辭嗰陣做埋宣傳，叫大家記得留意今日出爐嘅財政預算案。
把口密實滴水不漏
喺預算案揭盅前夕現身，陳家強都預咗記者會問佢財政預算案有冇糖派，所以佢有備而嚟，好鬼馬咁望一望隻錶，同記者講：「𠵱家七點半，大家同我一齊等多16個鐘，等曾司長正式同大家報告啦！」
佢仲提醒大家等嘅時候，要用多啲想像力，估吓份預算案係點喎！陳局長咁樣賣關子法，大家惟有努力想像吓，究竟今日財爺會派咩糖啦！
始終預算案係公家嘢，陳局長都要顧吓自己嗰瓣，撐一撐股巿，佢話雖然呢排個巿比較波動，但係佢對香港股巿絕對有信心。佢又用老鼠做比喻，話老鼠係主動、思想靈活、做事有組織又有系統嘅動物，同會計師一樣咁話。俾陳局長比喻為老鼠，在場班會計師唔知心裏面會點諗呢？