唔好以為細時同朋友仔鬥玩具多、測驗鬥高分，好天真好儍，其實大咗咪一樣人比人，同老死鬥人工高、座駕勁；好似曼聯球星朗尼就不安於目前坐擁嘅跑車群，準備斥資35萬鎊（約540萬港元）購入超級跑車SLRMcLarenRoadster，同基斯坦奴朗拿度（C朗）等同袍鬥車！
購超級跑車同C朗鬥鍊
正當C朗仲排緊隊購買價值1,360萬港元BugattiVeyron－－全球最貴跑車之一，朗尼已急不及待開出540萬港元支票，買入極速334公里嘅豪華跑車SLR。當然，歐洲賽期密不透風，朗尼咁忙，就算買咗該款跑車於英國唯一手波跑車，都可能英雄無用武之地；不過，多得麥卡倫帶挈英格蘭失去08歐國盃入場券，今年仲夏應該係朗尼響朵後最得閒嘅日子喇，肯定有風駛盡𢃇啦！
今年先22歲嘅朗尼，實情家中座駕十指難數，好似賓利、林寶堅尼、越野路華（RangeRover）等；內幕人士指該前鋒「鬥心」太強所致：「紅魔眾將每人起碼有幾部車，有如現實版嘅《頭文字D》一樣精采！」
學碧咸裝扮自暴其短
買新車講潮，朗尼算係潮人一族，但好衰唔衰，佢日前被揭發其時代觸覺，足足落後走在尖端嘅碧咸3年咁多啫！朗尼拖住未婚妻高蓮行街街，前者咖啡色絨褸、洗水牛仔褲；後者戴副黑超、長身風褸、bootcut牛仔褲，驟眼睇「疑似」型男索女。
不過，英國小報頂癮地拎咗碧咸夫婦05年現身英國曼徹斯特時嘅裝扮比較，一睇，幾乎如出一轍！真係唔到你唔服，所謂衫有相似，我求大俠唔敢判斷朗尼同高蓮係咪好out，就留待觀眾雪亮嘅眼睛分析吧！