休業一年的舒淇，前晚透露已調整心理，下月輕鬆復工拍笑片，甩拖多年的她更明言不再強求緣份，連白龍王都叮囑她寄情工作。準備今年結婚的劉嘉玲，則暗示要王家衛度期予梁朝偉，更希望斟洽王家衛為她倆拍攝婚禮video。
表揚亞洲傑出設計師及創作人的StyleAwards2008，前晚在灣仔君悅酒店舉行頒獎禮，今屆得獎者包括王家衛、劉嘉玲、舒淇、藝術家朱銘、鋼琴家李雲廸和設計師DerekLam等。姍姍來遲的舒淇以黑色大露背低胸晚裝示人，性感壓同場穿VivienneWestwood金裙的劉嘉玲。
復工拍喜劇
舒淇透露要遲到早走，她說：「我傾拍戲嘅事遲咗，今晚拎完獎仲要去台灣。」她謂自己的悠長假期宣佈結束，她說：「3月尾、4月會開拍新片，因為拍喜劇，所以都好輕鬆，合作嘅都係心目中嘅人選，不過未可以透露。」她指已經調整好心態，有心理準備開工。
至於感情事，舒淇揚言情人節也在柏林度過，已習慣一個人，她說：「緣份嘅事，冇乜辦法強求，我冇乜去諗識男仔，唔係唔需要愛情，係過慣咗。」她早前去見白龍王，獲贈蜜蠟手串，問到白龍王可有指點她愛情迷津？她說：「佢叫我畀心機做嘢喎。」
同場的劉嘉玲有意今年結婚，只待梁朝偉度期，她說：「佢好忙呀，一切籌備中，唔想多透露，到時會同大家分享。」問她可會代向王家衛度期？嘉玲說：「我諗佢會明白。」會否託王家衛操刀拍婚禮video？她即說：「我唔知佢有冇時間，我要同佢斟一斟先，我都想留番美好片段。」
關懷勝鑽戒
嘉玲再次否認她與偉仔已註冊的傳聞，又指自己婚禮是簡單而隆重，至於婚戒？她說：「唔需要幾多粒石，咁多年喇，互相慰問、關懷，比物質上嘅仲好。」
採訪：JessicaNgan
攝影：ChenWaiOn
