孖仔組合Soler前晚亮相《蘋果》網站直播節目《娛樂開CHAT》接受主持懷鈺訪問，在讀者面前難得坦白談論他們對性的看法。大孖Julio和細孖Dino分別接受心理測驗，要在狗、貓、老鼠、咖啡和海當中加上形容詞，當他們答到咖啡的時候，Julio用重要來形容，而Dino則答「香」，根據心理遊戲的內容，咖啡其實是代表對性的看法，二人立即捧腹大笑，異口同聲指這個心理測驗很有意思和準確。Soler表示今年工作重點放在亞洲區巡迴演出上，希望有更多樂迷能欣賞到他們的現場演出。他們更積極學習日文，為灌錄日語歌曲做準備。大家可登入《蘋果》網站 http://ent.appledaily.com隨時重溫節目。
採訪：懷鈺、林惠卿
攝影：仇志中
唱出Fans人生經歷
Chocona：你哋曾經講過下一個project想從fans生活度取材，咁你哋想喺fans中知道乜嘢？
Julio：都係睇你哋，我哋曾經喺個blog度邀請fans參與我哋寫歌過程，如果你哋有嘢想同你啲朋友分享，可以同我哋講，可能你哋講嘅嘢係啱第二啲人聽，因為好多人試過開咗個話題，之後變成一首歌，我覺得今時今日我哋需要接觸多啲人，多啲同大家傾偈。
Dino：我哋都收過唔少fans寄嚟嘅信，發覺冇一封係情信，全部都係講關於佢哋個人經歷，有開心，同好唔開心，或者之前唔夠勇氣去面對某啲問題，之後又多番啲精神，其實呢啲信對我哋來講都係好大幫助，所以我哋都有喺blog度呼籲大家如果有特別嘢想同人分享，可以同我哋講，等我哋都可以從中了解多啲。
一支結他繫歌迷
Holli：你哋做promotion，有時係成隊Band，有時會兩個人，咁你哋最鍾意邊樣？
Dino：其實兩樣都鍾意，好似今日咁，兩個人唱就最方便，因為得一隻結他，而且同大家近距離接觸，但當係一個大場，有好多觀眾嘅時候，要有隊Band先會有個氣勢喺度，所以要睇個情況。
地球暖化作題材
Alice：我有睇你哋個blog，知道你哋嚟緊隻碟係講「Allaboutlife」，你哋之前都有寫關於爹哋同媽咪嘅歌，仲有啲咩關於life係你哋想寫嘅？
Julio：我覺得現階段對我哋嚟講最重要係擴大我哋嘅私人空間，了解多啲現在呢個世界喺度發生緊咩事。我唔知係咪可以利用Soler呢個平台，可以牽涉晒所有人，當然話題越大越好，例如全球暖化呢個我哋好關心嘅問題，我哋希望下一個專輯可以寫類似呢啲比較廣闊一啲嘅話題。
勤練日文攻東洋
樂樂：我想知道你哋最近想學啲咩或者做啲咩？
Julio：我哋嚟緊好大可能係會去日本，所以現在目標係想盡快學日文。
