噚日會計師搞咗個新春酒會，潮州怒漢詹培忠同證監會市場監察部前執董狄勤思都有出席，兩人可謂「仇家」，皆因以前有過節，金勞詹曾經告當時係證監會企業融資部高級總監嘅狄勤思，話佢濫用職權。事隔多年，仇人見面非但冇眼紅，仲要係笑口騎騎碰晒杯，等華華見識到，呢個世界真係冇永遠嘅敵人。
另外，金勞詹同華華講，好多人關心佢會唔會參選9月立法會選舉，煲呔都問過佢，都想角逐嘅恒豐證券張華豐，更加叫金勞詹唔參選就早啲講，等佢有多啲時間搵票。
至於近日略為平息嘅淫照風波，緊貼時事嘅金勞詹又點會冇睇過，佢話係世侄蕭定一（蕭若元個仔）畀佢睇嘅，喺網上就冇睇過，因為原來佢唔識上網。家陣政府都鼓勵老人家活到老學到老，包括學吓上網，金勞詹要唔要都參加一份呢？