恭喜恭喜，華華恭喜恒生銀行（011）馮孝忠（圖）同曹達智，一踏入鼠年就有得升職（應該都有得加薪啩！）睇嚟今年好旺佢兩個。
恒生噚日出通告，升馮氏「坐正」做總經理兼投資及保險業務主管，佢06年加入恒生，做副總經理兼投資及保險業務主管，負責個人理財、私人銀行同企業財富管理嘅客仔。馮孝忠入恒生前喺星展銀行度做sellside嘅財資市場董事總經理，入恒生轉咗做buyside，可以話係轉型，但原來佢係香港大學文學學士出身，似乎佢嘅發展都好多元化。
至於曹達智就升做副總經理兼分行業務及直銷銀行業務主管，曹氏比馮孝忠早兩年加入恒生，當時係做高級經理兼客戶關係管理及市場拓展主管，跟住獲委任做高級經理兼分行業務及直銷銀行業務主管，今次升職前佢個職位係助理總經理兼分行業務及直銷銀行業務主管。