香港富豪未必個個有紅顏知己，但就大部份人都有保鑣，事關富豪其實冇乜私隱，佢哋嘅資料要搵唔難，住邊度都人所共知，所以好易成為綁架目標，好似最近因為紅顏而失江山嘅郭炳湘，就俾指早年遭綁架後，去邊都有幾個保鑣貼身保護。
前啹喀兵最受歡迎
富豪請保鑣各有要求，普遍嚟講都係要大堆頭，就算唔打得都嚇得。超人李嘉誠保鑣陣容最強盛，隨時十幾人出嚟，華華記得前年長實（001）同和黃（013）喺紅磡海逸酒店開股東大會，超人就帶住十幾個啹喀保鑣到場，人強馬壯。而李氏一家亦都係用啹喀保鑣，包括李澤鉅，反而李澤楷就貫徹唔跟大隊嘅性格，鍾意單人匹馬蒲頭。
論人強馬壯，四叔李兆基又點會輸畀超人，佢喺孫女李晞彤嘅「發實宴」當日接受記者訪問時，後面一字排開保鑣造成人牆。
啹喀保鑣似乎最受富豪歡迎，除咗超人家族，賭王何鴻燊同大劉劉鑾雄都係搵退役啹喀兵做保鑣。而林建岳、潘廸生就鍾情退役警隊保護要人組，即係俗稱嘅G4。早前淫照風波嘅主角陳冠希返港要搵貼身保鑣，就有傳林建岳借調佢平日請開嘅G4畀陳冠希。
私人保鑣除咗要個樣打得，成村人排排企嚇得吓人，仲要托得兼鋤得。好似超人去打高爾夫球時，保鑣會幫手托球具；潘廸生同太太余桂珠出埠，保鑣會幫手托行李。最搞笑係彤叔，佢上年2月出席澳門新葡京賭場開幕禮後，因為玩得太夜冇直升機坐要搭飛翔船返港，佢一入VIP房就拉住助手同保鑣陪佢鋤大弟。你話富豪嘅貼身保鑣係咪好得呢？
電郵：mailto:[email protected]
富豪貼身保鑣大檢閱
