港股連升兩日，噚日恒指再進賬769點，成交亦上番1000億元水平，基本上形勢又轉趨穩定，恒指又重上10日、20日同250日線之上，50日線在25289（下跌中），越來越接近早輪在25200的幾個高位，呢個水平會有壓力。
今日期指結算，噚日尾段突然插低百幾點，一來升得急，投資者變得審慎，二來美股連升三日後亦有回吐壓力，預計港股今日低開的機會好大，但由於技術走勢表現已普遍轉好，恒指略作調整後，有力上衝阻力，若能有大成交配合，而又以大裂口破位而上，則升浪再起，恒指目標將指向28000點。
上升正股有640多隻，大藍籌同國企成為火車頭，三四線股仔雖個別有突出表現，但整體而言仍未成氣候。通常升市都係大價股行先，中段之後，股仔才會接力而上，相信今次亦唔會例外，大市一升破位，股仔就會發威。
每股資產淨值0.8元
錦興集團（275）呢隻大偏低股，噚日已見「勒唔住」，一升就10%，收0.222元，成交更增到2600多萬股。兩年前，錦興股價0.35元，現時只得番三分二，同每股0.8元嘅資產淨值比較，更只得28%。
錦興一支大陽燭抽上去，已成功擺脫10日線（0.207元）、20日線（0.201元）同升破50日線（0.217元），升勢確認。
去年5月中，錦興曾高見0.74元，今年初落到0.18元才見底回升，一個大跌市，跌幅75%，好過份。鐘擺向兩極，跌過速，反彈亦會好急，以回升跌幅的0.382同0.5計，股價已可重上0.40元及0.46元，但相比NAV，折讓仲係好大。
業務多元化前景佳
睇番錦興盤數，08年度（3月年結）的中期，營業額6.52億元，大升6.4倍，盈利5.8億元，升18%。錦興投資十多間上市公司股份及可換股票據，期內就來自投資收益就有6.45億元。錦興中期獲利已超逾07年度全年的5.27億元，每股盈利14.8仙，即使唔計下半年度嘅收益，PE都只係1.5倍！
錦興除上市公司證券投資組合外，並經營多元化業務，包括採沙、工業化供水，以及在內地擁有涉及土地使用權及商業建築資產的多個項目，時機成熟又可為公司提供重大貢獻。