噚日港股重拾強勢，中資銀行股走勢亦相當強勁，北角阿Ben見工商銀行（1398）轉勢，心思思想買入睇長線。工行噚日收報5.41蚊，升3.4%。
沈：沈振盈 玲：楊慧玲
Ben：我想問吓中資金融股，今日工商銀行上番50天線，技術走勢好，可唔可以買入長揸？
沈：今日整體中資金融股板塊上升，扭轉咗之前弱勢！工行短期可先睇5.5至5.8蚊，如果個巿再好啲甚至可以睇到6.5蚊。佢07年業績一定冇問題，但係08年業績會點就仲未知。雖然巿場預期工行股價會跟住業績上升，但如果業績好唔過07年好多，股價就會跌。𠵱家內地對銀行嘅存款準備金同貸款都有限制，其實我懷疑佢嘅業績冇30%增長，不過短線可以博佢超賣出現反彈。如果睇長線，就要等佢全部壞因素消化晒，巿盈率又回落番到合理水平先再諗。你仲要留意埋外資點睇，同埋未來經濟增長發展。
Ben：長揸喺邊個價位入好？
沈：低過5蚊都可以考慮，不過唔係乜價買入都可以長揸。好似股神畢菲特呢種價值投資者，就算佢入中石油（857），都等超值先買。
Ben：長揸係咪招商銀行（3968）比較好？
沈：招行上升動力較大，長揸應該比工行好啲，工行因為規模太大，要有大增長比較難。
--北角Ben建議--
建議買入價：5.41元 目標價：7元
止蝕價：- 時期：一年
中國國航（753）
怕唔夠力上
黃小姐：我喺8蚊買咗中國國航（753），你哋點睇？
沈：國航唔夠力再上，波幅都喺7蚊至8蚊之間。油價係佢嘅死穴，巿盈率又有成29倍，冇乜誘因去買呢隻股。如果要買航空股，我會揀國泰航空（293），好多時巿況唔好，佢嘅盈利都有驚喜，比較穩陣，而且佢對冲油價做得好好。
黃：國航非流通A股解禁會唔會不利股價？
沈：因為流通量多咗，一定會有沽壓㗎喇，不過A股跌唔等於H股會跌喎，因為兩個巿場唔同，可能A股跌時H股反而會升，如果A股跌你又走去沽H股，可能會中招。
玲：黃小姐應該換馬定繼續等？
沈：可以等佢升番8蚊先走，再轉買其他貨。
--屯門黃小姐個案--
買入價：8元 目標價：8.5元
止蝕價：- 時期：一星期
申銀萬國（218）
受惠股指期貨上馬
羅先生：兩會就嚟開，啲「融資融券」（即借孖展）同股指期貨會上馬，所以睇好申銀萬國（218），佢哋係內地規模較大嘅證券行，如果佢做借孖展，借個額會幾大。股價喺低位好耐，今日又升，升勢應該持續。
沈：近期巿況一般，不過我同意佢股價喺低位，等緊突破。內地股巿比較震盪，股指期貨會等A股跌勢喘定先會推出，呢樣嘢比較長遠，但係現價入貨都冇壞。
羅：我上望股價7.8至8蚊，始終咁多禁售股，但嚟緊減印花稅對佢會有利。
沈：減印花稅只係提議，個巿呢排咁靜，一定會影響證券行生意，我自己做呢行就最清楚。
玲：記住要留意內地股巿動向，去番7蚊樓上應該有機會。
--柴灣羅先生建議--
建議買入價：6.7元 目標價：8元
止蝕價：6元 時期：三星期
招商銀行（3968）
跌都冇有怕
Kuromi：招商銀行（3968）股價跌過龍，加上憧憬佢業績會好，所以想喺26.5蚊買入。
沈：中資金融股當中我最睇好招行，好多大陸投資者最鍾意招行，因為佢哋夠進取同冇陋習。
Kuromi：萬一佢跌我轉長揸都唔怕。
沈：你可以喺25蚊定止蝕，短線睇佢升到30蚊，中線可以睇到31蚊至32蚊。
玲：今日佢有25億非流通A股禁售期屆滿，但係股價冇跌，喺香港仲升咗7%喎！
沈：千祈唔好以為佢升就冇事，我擔心好多人等高位先沽貨。不過招行係六行之中業績最好，管理又最可信，預計波幅會喺25至32蚊之間，可以低位吸納。
--小西灣Kuromi建議--
建議買入價：26.5元 目標價：32元
止蝕價：- 時期：一個月
平安保險（2318）
睇好今年業績
李小姐：想睇吓平安保險（2318），等佢過咗股東特別大會，睇吓集資計劃成唔成功先買。
沈：你點睇佢08年業績？
李：經濟好，會多啲人買保險，所以我睇好佢今年業績。
沈：最近巿場憂慮佢集資目的同用途，而且佢今年業績未必好，收入方面包括投資收益，A股反覆有機會拖累業績。佢07年嗰時巿盈率只係24倍，𠵱家股價調整咗巿盈率都有47倍，如果佢公佈咗08年業績，巿盈率落番24倍就買得過。
李：咁有冇機會升到去80蚊？
沈：要睇未來巿況，止蝕價可以定喺50蚊，最多都係輸一成，阻力位會喺68蚊，想買嚟揸長線，中資金融股仲未係時候。
--屯門李小姐建議--
建議買入價：55元 目標價：80元
止蝕價：50元 時期：半年