英超球星醉酒搞事打人嘅新聞司空見慣，但好似熱刺球員咁俾狗仔隊影到正，就真係好少見，其中隊長京治仲被影到出手打人。佢哋呢個「醉貓派對」丟盡熱刺嘅面，睇嚟會有手尾跟，今次真係酒精害人，影響一生。
捧聯賽盃酒吧狂歡
熱刺喺禮拜日英聯盃決賽反勝車路士2:1捧盃後，領隊拉莫斯為咗獎勵班球員，將由佢定嘅節食令解除一日，准佢哋劈酒狂歡。熱刺班嘩鬼當晚付諸行動，拉大隊落咗倫敦一間叫Faces嘅夜店度玩，出席球員包括侯頓、侯度史東、占邦達、卡保奧、馬白蘭基、贊拿斯、艾朗連儂同埋隊長京治等，而電視台亦有報道佢哋去蒲嘅情況。
據講熱刺班球員好快就飲到high晒，其中京治仲開始搞事，於是在場職員立即出手，請佢離開。點知身高1米88、重91公斤嘅京治發難，仲用雙手叉住其中一個職員條頸，要侯頓同隊友夾手夾腳先拉得開佢。
據在場人士所講：「京治飲到醉晒，又大隻，佢哋幾經辛苦先至捉得住佢。」
碧咸個妹亦醉醺醺
除咗京治之外，艾朗連儂同埋贊拿斯都飲到貓晒，其中前者仲想發難搞事，好彩俾班隊友㩒住；贊拿斯就冇郁手郁腳，但飲到反白眼嘅樣，直頭成條死屍咁。球員身邊又點會冇女伴，啱啱同前熱刺前鋒廸科爾分咗手嘅丹妮莉，就同埋碧咸個妹祖安一齊出席，雖則佢哋冇搞事，但貓樣就入晒鏡頭，認真失禮。唔知碧咸之後會唔會捉祖安去照肺呢？
我求大俠未知道拉莫斯會唔會秋後算賬，但佢份人不嬲好嚴，睇怕都要班球員進行地獄式減肥就知啦！所以有份喺「醉貓派對」搞事嘅球員，應該會受到處分。
話時話，聽聞熱刺已撥咗4,000萬鎊俾拉莫斯喺今夏擴軍，班球員如果再唔生性，下屆隨時冇碇企。