有個好耐冇見嘅朋友，只係30歲左右，正值壯年，老婆又啱啱生咗，但佢新年前竟突然心臟病發，仲要通波仔。佢事後同我講，手術、住院費成23萬蚊，以為公司僱員醫療保險嘅保障可以補償大部份費用，但發現份保險內大型手術同住院費用嘅最高賠償額只有12萬，最後佢要自行承擔11萬差額。唉，仔細老婆嫩，呢個數目唔係每個打工仔都負擔到。
同做保險嘅Crystal傾開，佢話如果已有僱員或私人醫療保險，都可以買一份「相輔式」醫療保險，因為大多數僱員醫療保險保障，並不足以應付大型同複雜手術開支，好似心臟搭橋手術等。相輔式計劃畀客戶自由選擇一個每年醫療保障自負額，俗稱「墊底費」，就可以有保費折扣。
以我朋友為例，佢可以根據現有醫療保障嘅最高賠償額，選擇港幣12萬蚊為每年醫療保障自負額，咁就可能有例如低至三五折嘅保費優惠；如果將來不幸要做手術，可以先向僱員醫療保險公司索償，醫療費用超過12萬嘅餘款，就由相輔式計劃根據保障範圍承擔。
逢周一至周四刊出