地產代理為咗單刁，撞啱個業主唔喺香港，經常都會出動千里送定金呢類招數，尤其係返內地或者過大海去澳門就最多，間唔中都有去東南亞地區，不過，好似美聯物業近排一單刁咁，玩到要飛去日本，就比較少見。
買家擔心業主反價
個盤係觀塘裕民中心高層一個695呎單位，業主早喺99年以215萬銀買入，但之後業主長期留喺日本做嘢，好少返港，所以想賣樓套現。個單位早幾日以278萬銀賣出，9年間升29%，業主執63萬銀。
美聯代理Eric話，通常呢類隔山「賣」牛嘅刁，會搵速遞或者由屋企人代簽，然後等業主親自返港搞正式手續。佢做咗咁多年經紀，都係第一次接到買賣雙方同時提出要求，想佢攞定金同臨約飛去日本搞掂單刁。佢估計，可能個樓市變得太快，大家都唔想有變卦，買家亦擔心業主反價，所以託佢飛去東京一轉囉。
再問清楚，原來呢轉機票同一晚酒店住宿由公司孭飛，但Eric話，呢次係佢第二次飛日本，第一次仲要係跟團，全程有人帶，今次就要自己摸，都咪話唔擔心，好彩一切順利，雖然冇得順道遊歷吓，但可以有萬零銀佣落袋，算係咁囉。