港股暫時冇方向，噚日受外圍帶動，恒指又上升445點，收23714，仍然係在250日線（23801）上下穿梭之局，成交亦無啓示，只有686億元，即月期指略為高水，3月期指略為低水，暫時人心仍係偏淡，下跌正股都超過420隻。
大市基本上係在「打底」，恒指由去年10月30日的31958回落，到上月22日的低位21709，共下跌10249點，跌幅32%，時間84日，以一次中期調整來計，跌幅已足夠，時間或許未夠，因此有必要在低位整固，甚至有再創新低的可能性，如此，在時間性方面亦可完全符合要求。由於跌幅已大，即使再創新低，距離亦不會太遠。
新能源股係今年投資嘅主打對象，早輪已推介過光大國際（257）和香港建設（190），至於華基光電（155），更加係一隻未升過嘅太陽能股，由於其Project已開始進入收成期，其股價今年有機會以倍計上升。
技術問題已獲解決
華基由去年初的1元高價反覆回落，到上月底跌到0.40元水平才回升，同外國的新能源股上升數倍的表現背道而馳，主要原因係發展計劃有阻滯，未能如期完成，直到今年初，技術問題解決，公司交付第一條生產線，而餘下的30條生產線亦會在今年內陸續交付，公司正式進入收成期，初步估計一年可獲利數億元，預測PE只係幾倍。
華基專營同開發太陽能電池板的光電薄膜技術，現時在無錫的項目，總投資37億元，華基負責供應30條非晶矽薄膜光電板生產線，第一條最近已安裝完成並生產，華基並安排包銷每年總值達30億元的產品。
PE遠低於外國同業
對華基而言，無錫項目提供兩個盈利來源，一個係供應生產線，全部安裝完成可獲利約8億元，估計會分兩年入賬，每年4億元；而明年開始，包銷產品估計賺10%亦獲利3億元。華基現市值23億元，09年度（3月年結）預測PE只係5.7倍，再下一年更低至3.3倍，相比現時外國上市同業PE平均的數十倍，確實好吸引。
華基股價由0.40元回升，在0.50元整固完成，昨日再展升浪，初步上升目標係0.64元，持中線，下半年可重上1元水平。